Mańǵystaýdaǵy qustardy qorǵaý jobasyn iske asyra almaǵan qoǵamdyq qor qarjyny keri qaıtarady

MAŃǴYSTAÝ. KAZINFORM — Komıssııa tekserýinen soń osyndaı sheshim qabyldady. Kelisimshart buzylyp, memleketke 10 mln teńgeni qaıtarý mindetteldi.

Mańǵystaý oblystyq tabıǵı resýrstar jáne tabıǵatty paıdalanýdy retteý basqarmasy men «Qazaqstannyń ekologııalyq qory» qoǵamdyq qory arasynda deldal qyzmetin atqarǵan «Azamattyq bastamalardy qoldaý ortalyǵy» KEAQ-y óz sheshimin shyǵardy. 

— «Jabaıy qustardy saqtaý jáne olarǵa ýaqtyly kómek kórsetý» jobasyna monıtorıng júrgizildi. Ortalyq áleýmettik jobalardy odan ári iske asyrýdy ońtaılandyrý jáne grant qarajatyn tıimdi bólýdi qamtamasyz etý maqsatynda grant alýshymen aradaǵy kelisimshartty buzdy, qarajatty tolyq kólemde bıýdjetke qaıtarý mindetteldi. Sonymen qatar «Qazaqstannyń ekologııalyq qory» qoǵamdyq qory júzege asyryp jatqan barlyq jobaǵa keshendi tekseris júrgizý, taldaý sheshimi qabyldandy, — dep habarlady «Azamattyq bastamalardy qoldaý ortalyǵy» KEAQ-y.

Ortalyq granttyq jobalardyń oryndalýyn óz betinshe baqylaýǵa múmkindik beretin qoǵamdyq monıtorıng júıesi bar ekenin eske salady.

Buǵan deıin bloger Azamat Sársenbaev qustardy qorǵaý jumystaryna 10 mln teńge bólingenin kezdeısoq bilip, shý shyǵardy. Al tapsyrys berýshi Mańǵystaý oblystyq tabıǵı resýrstar jáne tabıǵatty paıdalanýdy retteý basqarmasy jumysty durys oryndamaǵan qoǵamdyq qorǵa eki ret eskertý berdi.