Mańǵystaýdaǵy ken ornynda qubyr jaryldy
AQTAÝ. KAZINFORM – Oqıǵa «Ózenmunaıgaz» kompanııasyna qarasty №4 Munaı gaz óndirý basqarmasynyń sý aıdaý júıesindegi magıstral qubyrynyń boıynda bolǵan.
Abyroı bolǵanda zardap shekkender joq.
Osy oqıǵa boıynsha atalǵan kompanııa resmı jaýap berdi.
-27 sáýir kúni saǵat 15:15 shamasynda NSM-4 sorǵy stantsııasynan 3,8 shaqyrym qashyqtyqta (№38 TQ burylys mańy) dıametri 1020 mm bolat qubyrdyń ústińgi bóligi tesilip, sý atqylady. Oqıǵa ornyna jedel jetken mamandar az ýaqyt ishinde sýdy rezerv jelige aýystyrdy. Avarııa brıgadalary men arnaýly tehnıka jumyldyrylyp, jóndeý jumystary júrgizildi. Qubyrdan shyqqan sý taza teńiz sýy bolǵandyqtan qorshaǵan ortaǵa zııan keltirilgen joq. Qazirgi ýaqytta júıe shtatty rejımde jumys istep tur, - delingen habarlamada.
Buǵan deıin, Aqtaýdaǵy «MAEK» JShS-de tuz qyshqylynyń shashyraýynan 2 qyzmetker zardap shekken bolatyn.