Mańǵystaýdaǵy qaıǵyly oqıǵaǵa baılanysty Prezıdentke kóńil aıtý jedelhattary kelip jatyr
ASTANA. KAZINFORM — Kaspıı teńizindegi oqý-jattyǵý jıyny kezinde qazaqstandyq áskerı qyzmetshilerdiń qaza tabýyna baılanysty Qazaqstan Prezıdentiniń atyna shet memleketter basshylary men halyqaralyq uıymdardyń jetekshilerinen kóńil aıtý jedelhattary kelip túsip jatyr. Bul týraly Aqorda málim etti.
— Ózbekstan Prezıdenti Shavkat Mırzıeev pen Qyrǵyzstan Prezıdenti Sadyr Japarov Qasym-Jomart Toqaevqa jáne qaza bolǵan jandardyń týǵan-týystaryna, sondaı-aq Qazaqstan halqyna qaıǵyǵa ortaqtasyp kóńil aıtty. Memleket basshysy qıyn sátte jubatý sózin jetkizgen áriptesterine rızashylyq bildirip, halyqaralyq qoldaý men tileýlestiktiń aıryqsha mańyzdy ekenin atap ótti, — delingen habarlamada.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Búgin Kaspııde eki áskerı qyzmetshini izdeý operatsııasyna júzdegen adam jumyldyrylǵany habarlandy.
Áskerı qyzmetshilerdiń qaza bolýyna baılanysty qyzmetine salǵyrty qaraǵan birqatar laýazymdy tulǵa kúdikke ilindi.
Búgin úzdiksiz júrgizilgen izdestirý-qutqarý jumystary barysynda buǵan deıin iz-túzsiz joǵalǵan eki áskerı qyzmetshiniń — serjant Mansur Gýmarov pen matros Mıras Turdybekulynyń denesi tabyldy.
