Mańǵystaýdaǵy qaıǵyly oqıǵa týraly jalǵan aqparat taratqandar jazalandy
ASTANA. KAZINFORM – Polıtsııa Mańǵystaý oblysynda bolǵan tótenshe jaǵdaıǵa qatysty áleýmettik jelilerde shyndyqqa sáıkes kelmeıtin aqparat taratqan birneshe azamatty anyqtady, dep habarlaıdy Polisia.kz.
Polıtsııa málimetinshe, D.S. jáne G.S. esimdi azamattar Facebook paraqshalarynda áskerı qyzmetshi A.A.-nyń sýǵa batyp bara jatqan joldasyn qutqaryp, óz betimen jaǵaǵa shyqqany týraly aqparat jarııalaǵan. Sondaı-aq olar áskerı qyzmetshiniń erligi men qutqarylý jaǵdaılary qasaqana jasyrylyp otyrǵany jóninde málimet taratqan.
Tekserý kezinde D.S. bul aqparatty alystaǵy týystarynan alǵanyn aıtqan. Al G.S. málimetti áleýmettik jelilerden kórip, shynaıylyǵyn teksermesten óz paraqshasynda jarııalaǵanyn túsindirgen.
Qorǵanys mınıstrligi atalǵan málimetterdi resmı túrde joqqa shyǵardy. Vedomstvo aqparaty boıynsha, áskerı qyzmetshi A.A. oqý-jattyǵý kezinde jaǵalaýda bolyp, josparǵa sáıkes ózine júktelgen mindetterdi oryndaǵan. Onymen birge merzimdi áskerı qyzmettegi matros M.Á. bolǵan. Qazir eki áskerı qyzmetshi de áskerı bólim ornalasqan jerde qyzmetin jalǵastyryp jatyr.
– Áleýmettik jelilerde A.A.-nyń óz betimen jaǵaǵa júzip shyqqany, sýǵa batyp bara jatqan joldasyn qutqarǵany jáne onyń erligi týraly aqparattyń qasaqana jasyrylyp otyrǵany jóninde taraǵan málimetter shyndyqqa sáıkes kelmeıdi, – delingen habarlamada.
Polıtsııa budan bólek Shymkent qalasynyń turǵyny S.K. men Kókshetaý qalasynyń turǵyny K.O.-ny anyqtady.
S.K. Facebook paraqshasynda taǵy bir áskerı qyzmetshiniń qaza bolǵany, onyń týystaryna qysym kórsetilip, olardan aqsha talap etilip otyrǵany týraly aqparat jarııalaǵan. Al K.O. Mańǵystaý oblysynda taǵy bir áskerı qyzmetshiniń qaza bolǵany jóninde málimet taratqan. Polıtsııa bul aqparattardyń da shyndyqqa sáıkes kelmeıtinin málimdedi.
Ákimshilik materıaldardy qaraý nátıjesinde sot sheshimimen atalǵan tulǵalar ákimshilik jaýapkershilikke tartylyp, 20 AEK mólsherinde aıyppul salyndy.
Polıtsııa basqa tulǵalardyń materıaldaryn qaıta jarııalaý da jaýapkershilikten bosatpaıtynyn eskertti. Sondaı-aq áleýmettik jeli qoldanýshylaryn aqparattyń shynaıylyǵyn tekserip, rastalmaǵan málimetterdi taratpaýǵa shaqyrdy.
Aıta keteıik, buǵan deıin Mańǵystaý oblysynda áskerı qyzmetshilerdiń qaza bolýyna baılanysty eki bap boıynsha qylmystyq is qozǵalǵany habarlanǵan bolatyn.
