Mańǵystaýdaǵy qaıǵyly oqıǵa: Qorǵanys mınıstrligi júıesinen bes laýazymdy tulǵa ustaldy
ASTANA. KAZINFORM — Qyzmetke salǵyrt qaraý jáne korabl júrgizý qaǵıdalaryn buzý boıynsha aýyr zardaptarǵa ákep soqqan qylmystyq quqyq buzýshylyqtar jasady degen kúdikpen Qazaqstan Respýblıkasy Qarýly Kúshteriniń joǵary jáne aǵa komandalyq quramyndaǵy jaýapty laýazymdy tulǵalar ustaldy.
Ustalǵandardyń qatarynda - QR QK Áskerı-teńiz kúshteri Bas qolbasshysynyń birinshi orynbasary - shtab bastyǵy, eki áskerı bólimniń komandıri, sondaı-aq teńiz jaıaý áskerleri rotasynyń jáne «Qaısar» kateriniń komandırleri bar.
Olardyń barlyǵy kúdikti dep tanylyp, Aqtaý qalasy Polıtsııa basqarmasynyń ýaqytsha ustaý ızolıatoryna qamaldy.
«Hazar Qorǵany – 2026» oqý-jattyǵýy kezinde áskerı qyzmetshilerdiń qaza bolý faktisi boıynsha ІІM-niń áskerı-tergeý bólimshesi sotqa deıingi tergep-tekserý júrgizilip jatyr.
24 qyrkúıekte Kaspıı teńiziniń jaǵalaýynda, Aqtaý qalasynan 43 shaqyrym jerde oqý-jattyǵý barysynda «Qaısar» katerinen jeke quramdy túsirý kezinde qolaısyz meteorologııalyq jaǵdaıda áskerı qyzmetshilerdi teńiz aǵysy alyp ketkeni anyqtaldy.
Tergeý barysynda oqý-jaýyngerlik mindetti uıymdastyrý jáne oryndaý kezinde sheshimderdiń qabyldaný mán-jaılary, qaýipsizdik talaptarynyń saqtalýy, gıdrometeorologııalyq jaǵdaıdyń eskerilýi, katerdiń tehnıkalyq jaı-kúıi, sondaı-aq oqý-jattyǵýdy ótkizýge jáne jeke quramnyń qaýipsizdigine jaýapty laýazymdy tulǵalardyń áreketteri zerdelenip jatyr.
Qajetti tergeý jáne protsestik is-sharalar júrgizilip jatyr. Barlyq kúdikti tulǵalardyń áreketterine zańda belgilengen tártippen quqyqtyq baǵa beriledi.
Sotqa deıingi tergep-tekserý barysy Qazaqstan Respýblıkasy Іshki ister mınıstrligi men Bas prokýratýrasynyń erekshe baqylaýynda.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Búgin Kaspııde eki áskerı qyzmetshini izdeý operatsııasyna júzdegen adam jumyldyrylǵany habarlandy.
Sonymen qatar áskerı qyzmetshilerdiń qaýipsizdigine jaýapty tulǵalar kúdikke ilingeni týraly jazǵan edik.
Aıta ketelik Kaspııdegi tótenshe jaǵdaıdan keıin qutqarylǵan áskerı qyzmetshi esin jıǵan edi.
Búgin Kaspıı teńizinde joǵalǵan eki áskerı qyzmetshiniń denesi tabylyp, izdestirý operatsııasy aıaqtalǵan edi.
Sonymen qatyr Kaspııdegi áskerı qyzmetshilerdiń qazasyna baılanysty qylmystyq is eki bap boıynsha tergelip jatyr.
