Mańǵystaýdaǵy qaıǵyly oqıǵa: áskerı qyzmetshilerdiń qaýipsizdigine jaýapty tulǵalar kúdikke ilindi
ASTANA. KAZINFORM — Mańǵystaýda oqý-jattyǵý kezinde áskerı qyzmetshilerdiń qaza bolýyna baılanysty tergeý jalǵasyp jatyr. Іs boıynsha birqatar laýazymdy tulǵa kúdikke ilindi. Bul týraly Bas prokýratýra málim etti.
Prokýratýranyń málimetinshe, oqıǵa ornyna qarap-tekserý júrgizilip, 30-dan astam áskerı qyzmetshiden jaýap alynyp, qujattar men beınematerıaldar tárkilengen. 12 saraptama taǵaıyndalǵan.
— Qyzmetke salǵyrt qarady dep kúdik keltirilgen, sondaı-aq meteorologııalyq jaǵdaılardy eskere otyryp, jeke quramnyń qaýipsizdigin qamtamasyz etý úshin tıisti baqylaý men qajetti sharalardyń qabyldanýyn qamtamasyz etpegen, qutqarý jumystaryn tıisinshe uıymdastyrmaǵan, sonyń saldarynan adamdardyń qaza bolýyna ákep soqqan laýazymdy tulǵalar anyqtaldy, — dep habarlady quzyrly organnan.
Tergeý barlyq kúdiktilerdiń áreketterine tolyq quqyqtyq baǵa berip, olarǵa qatysty protsestik sharalar qabyldaıdy.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Búgin Kaspııde eki áskerı qyzmetshini izdeý operatsııasyna júzdegen adam jumyldyrylǵany habarlandy.
