Mańǵystaýdaǵy qaıǵyly oqıǵa: 300-den astam adamnan jaýap alyndy
ASTANA. KAZINFORM — Áskerı qyzmetshilerdiń qaza tabýyna qatysty tergeý barysy Bas prokýratýranyń erekshe baqylaýynda.
Іshki ister mınıstrliginiń áskerı-tergeý organdary Mańǵystaý oblysynda oqý-jattyǵý kezinde áskerı qyzmetshilerdiń qaza tabý deregi boıynsha qylmystyq isti tergeýdijalǵastyryp jatyr.
Qaıǵyly oqıǵanyń barlyq mán-jaıyn jan-jaqty ári obektıvti anyqtaý úshin keshendi tergeý áreketteri júrgizildi.
— Qazirge deıin 300-den astam adamnan jaýap alynyp, 30-dan astam sot saraptamasy men zertteý júrgizildi, — delingen habarlamada.
Eske sala keteıik, tergeý barysynda qyzmetke salǵyrt qarady jáne keme júrgizý qaǵıdalaryn buzdy degen kúdikpen 8 laýazymdy tulǵa sot sanktsııasymen qamaýǵa alyndy. Olar — Qarýly Kúshterdiń Áskerı-teńiz kúshteriniń bas qolbasshysy, onyń birinshi orynbasary men jaýyngerlik daıarlyq jónindegi orynbasary, eki áskerı bólimniń komandırleri, teńiz jaıaý áskeri batalony men rotasynyń komandırleri, sondaı-aq kater kapıtany.
Qylmystyq-protsestik kodekstiń 201-babyna sáıkes sotqa deıingi tergep-tekserýdiń ózge derekterin jarııa etýge bolmaıdy.
Jaqyn arada tergeý áreketterin aıaqtap, qylmystyq protseske qatysýshylardy is materıaldarymen tanystyrý josparlanyp otyr.
Tergeý barysy Bas prokýratýranyń erekshe baqylaýynda.
