Mańǵystaýdaǵy Qaraqabaq qalashyǵynan VI ǵasyrǵa jatatyn biregeı jádiger tabyldy
AQTAÝ. KAZINFORM — Mańǵystaý oblysyndaǵy kóne Qaraqabaq qalashyǵynda júrgizilip jatqan arheologııalyq qazba jumystary kezinde qundy tarıhı jádiger — kóne qumyra tabyldy. Ǵalymdardyń aldyn ala paıymdaýynsha, artefakt bizdiń zamanymyzdyń VI ǵasyryna jatady.
Qundy olja týraly áleýmettik jelide arheolog Andreı Astafev málimdedi. Aldyn ala júrgizilgen taldaý nátıjeleri qumyranyń jergilikti sheberlerdiń qolynan shyqqanyn kórsetip otyr.
Mamannyń aıtýynsha, artefaktini jan-jaqty zertteý arqyly kóne qalashyq turǵyndarynyń turmys-tirshiligin, dástúrleri jáne qolóneriniń damýy týraly tyń málimetter alýǵa múmkindik bar.
Qaraqabaq qalashyǵy — Mańǵystaý oblysyndaǵy eń mańyzdy ári biregeı arheologııalyq eskertkishterdiń biri. Taýshyq aýylynyń mańynda ornalasqan kóne qala shamamen bizdiń zamanymyzdyń I–VI ǵasyrlary aralyǵynda ómir súrgen.
Zertteýshilerdiń pikirinshe, Qaraqabaqtyń ashylýy Mańǵystaý óńiriniń tarıhyna qatysty kózqarasty túbegeıli ózgertti. Bul jańalyq ejelgi Mańǵyshlaq túbegi tek kóshpeli taıpalardyń mekeni ǵana emes, sonymen qatar otyryqshy qalalyq mádenıeti damyǵan óńir bolǵanyn dáleldedi.
Buǵan deıin, Mańǵystaýda tarıhı Qaraqabaq qalashyǵynda zertteý jumystary bastalǵanyn jazǵan bolatynbyz.
