Mańǵystaýdaǵy Qapam ata jartasty meshitine zańsyz ornatylǵan plastık tereze men esik alyndy
AQTAÝ. KAZINFORM – Túpqaraǵan aýdanyndaǵy Qapam ata jartasty meshitiniń kireberisine ornatylǵan plastık tereze men esik alynyp, tarıhı nysannyń bastapqy kelbeti qalpyna keltirildi.
Taýshyq aýylynyń ákimi Nurjan Baqtybaevtyń aıtýynsha, meshitke qoıylǵan plastık qurylymdar demontajdalǵan. Jartasty meshittiń qazirgi kelbeti beınelengen vıdeo áleýmettik jelilerde jarııalandy.
Buǵan deıin oblystyq tarıhı-mádenı qoryǵy basshylyǵy Qapam ata meshitin jergilikti mańyzy bar memlekettik qorǵaýǵa alynatyn nysandar tizimine engizý máselesi qaralyp jatqanyn málimdedi. Osy maqsatta ótken jyldyń jazynda tarıhı-mádenı saraptama júrgizilip, onyń nátıjesinde meshittiń tarıhı qundylyǵy rastalǵan. Soǵan qaramastan, jeltoqsan aıynda nysanǵa plastık tereze men esik ornatylǵany belgili boldy.
Quzyrly organ bul áreketti tarıhı-mádenı mura nysanyna jasalǵan zańsyzdyq dep, kináli tulǵalarǵa izdeý jarııalady.
Aıta keteıik, budan buryn Mańǵystaýda kóne meshitti búldirgender izdestirilip jatqanyn jazǵan bolatynbyz.
