Mańǵystaýdaǵy ınsýlt ortalyǵy Qazaqstan boıynsha úzdik atandy

AQTAÝ. KAZINFORM — Mańǵystaý oblystyq kópbeıindi aýrýhanasynyń ınsýlt ortalyǵy jýyrda Astana qalasynda ótken «Insýlt mektebi-2025» halyqaralyq konferentsııasynda Qazaqstan boıynsha úzdik atanyp, 1-orynǵa ıe boldy.

Halyqaralyq is-sharaǵa elimizdiń ınsýlt ortalyǵyna jaýapty bas dárigerler men Italııa, Ýkraına jáne AQSh elderiniń professor-ǵalymdary qatysqan. Mańǵystaý oblystyq ınsýlt ortalyǵynyń bólim meńgerýshisi Іlııas Qulymbaevtyń aıtýynsha, jumys sapasy men ındıkatorlyq kórsetkishterdiń nátıjeli bolýy joǵary baǵalanǵan. 

— Mańǵystaý oblystyq kópbeıindi aýrýhanasy janyndaǵy ınsýlt ortalyǵy 2012 jyly ashyldy. Búginde munda 8 dáriger jumys isteıdi. Insýlttyń deńgeıleri ár túrli bolady ǵoı. Sonyń ishinde ıshemııalyq ınsýltpen naýqastar jıi túsedi. Olardyń jas shamasy 50- 65 jas aralyǵynda. Bir jylda shamamen 1 300-deı naýqasty emdeımiz. Indıkatorlyq kórsetkish joǵary bolyp, «Úzdik ınsýlt ortalyǵy» atandyq. Bul ujymdyq eńbektiń nátıjesi, -deıdi ortalyq meńgerýshisi Іlııas Qulymbaev.

Buǵan deıin, Aqtaýda sheteldik dárigerler 3 balaǵa kúrdeli ota jasaǵany týraly jazǵan bolatynbyz.