Mańǵystaýdaǵy Bozjyra shatqalyna qatynaý jeńildeıdi

AQTAÝ. KAZINFORM — Jobaǵa 3 mıllıard teńgeden astam qarjy jumsalady. Bul týraly Qaraqııa aýdany ákimdigi habarlady.

Jobaǵa tapsyrys berýshisi — «Qaraqııa aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi» memlekettik mekemesi. Tender jeńimpazy — «Aq jol qurylys» JShS jobany 2 513 222 944,4 teńgege júzege asyrýdy usynǵan. Qosymsha qun salyǵyn eskergende, kelisimsharttyń jalpy somasy shamamen 3,159 mıllıard teńgeni qurady.

Aımaqtaǵy eń tanymal týrıstik nysandardyń birine uzyndyǵy 13,2 shaqyrym bolatyn jol salynady. Jol qurylysymen qatar, Bozjyra aýmaǵynda eki vızıt-ortalyqtyń qurylysy da bastalǵan bolatyn. Qazirgi ýaqytta olardyń bireýi tolyq aıaqtalǵan. Ol kelesi týrıstik maýsymda paıdalanýǵa beriledi.

— Qazir Bozjyra shatqalyna baratyn joldyń qurylys jumystary júrgizilip jatyr. Jalpy qurylys jumystary 9 aıǵa josparlanǵan. 2026 jyldyń shilde aıyna deıin salynyp bolýy tıis. Bozjyra shatqalyna buryn týrısterdiń, jalpy halyqtyń barýy óte qıyn bolatyn. Jol talǵamaıtyn kóliktermen ǵana baratyn. Endi jol salynǵan soń jeńil kólikpen de barýǵa múmkindik týady. Bul oblysta týrızmdi damytýǵa óziniń oń septigin tıgizedi dep esepteımiz, — deıdi Qaraqııa aýdany ákiminiń orynbasary Sanat Tókenov.

Buǵan deıin, Mańǵystaýda Bozjyra shatqalynda vızıt-ortalyǵynyń qurylysy bastalǵanyn jazǵan bolatynbyz.