Mańǵystaýdaǵy avtogaz tapshylyǵy qashan sheshiledi
AQTAÝ. KAZINFORM — Aqtaýda kólik júrgizýshileri avtogaz quıý beketterindegi uzyn-sonar kezekke shaǵymdanyp jatyr. Qala men qala mańyndaǵy birqatar bekette gaz joq nemese jumys istemeı tur. Al gaz bar stantsııalarda kólikter kezek kútýge májbúr.
Óńir bıligi jaǵdaıdyń sebebin túsindirip, suıytylǵan munaı gazyn jetkizý kólemi jaqyn arada turaqtanatynyn málimdedi.
Mańǵystaý oblystyq kásipkerlik jáne saýda basqarmasynyń basshysy Pikir Sansyzbaevtyń aıtýynsha, óńirde suıytylǵan munaı gazyn tutyný kólemi joǵary. Oblysta 185 myńnan astam avtokólik tirkelgen. Onyń 103 myńnan astamy nemese 56 paıyzy gazben jabdyqtalǵan. Budan bólek, sońǵy úsh jylda shetelden tranzıttik nómirmen 22 myńnan astam kólik ákelingen. Olardyń basym bóligi suıytylǵan munaı gazyn tutynady.
Aı saıyn oblysqa Jańaózendegi «Qazaq gaz óńdeý zaýytynan» jáne Atyraý munaı óńdeý zaýytynan 18 myń tonna negizgi jáne 1-2 myń tonna kóleminde qosymsha gaz jetkiziledi. Alaıda 25 maýsym men 15 shilde aralyǵynda Atyraý munaı óńdeý zaýytynda josparly jóndeý jumystary júrgizilgen. Osyǵan baılanysty qosymsha bólinetin 1 myń tonna suıytylǵan munaı gazy Aqtóbedegi «SNPS-Aqtóbemunaıgaz» zaýytynan jetkizile bastaǵan. Qazirgi tańda Aqtóbe zaýytynan bólingen 1 myń tonnanyń 438 tonnasy Mańǵystaýǵa jetkizilgen, qalǵan 556 tonnasy jolda. Gazdyń temirjol arqyly tasymaldanýy logıstıkalyq qıyndyqtar týǵyzyp, ónimniń óńirge keshigip jetýine áser etken.
— Atyraý munaı óńdeý zaýyty 20 shildeden bastap tolyq óndiristik rejımge ótti. Osyǵan baılanysty Energetıka mınıstrligi shilde aıyna qosymsha kólem bóldi. Atyraýdan negizgi jáne qosymsha kólemderdi eseptegende 2 myń tonna suıytylǵan munaı gazy kele bastaıdy, — deıdi Pikir Sansyzbaev.
Onyń aıtýynsha, jaz maýsymynda óńirde suıytylǵan munaı gazyn tutyný kólemi 15-20 paıyzǵa artady. Buǵan Mańǵystaýdyń týrıstik aımaq bolýy jáne jaz mezgilinde kólik qozǵalysynyń kóbeıýi sebep.
Sonymen qatar aýdan ákimdikteri avtogaz quıý stantsııalaryna kún saıyn eki ret monıtorıng júrgizip jatyr. Jumys ýaqytynan erte jabylǵan, kesh ashylǵan nemese avtogazdy tek talon arqyly satatyn beketter anyqtalǵan jaǵdaıda, zań aıasynda sharalar qabyldanatyny aıtyldy.
Al Aqtaý qalasy ákiminiń orynbasary Beknur Bálıuly gaz tapshylyǵyna baılanysty onyń baǵasy kóteriledi degen aqparattyń shyndyqqa janaspaıtynyn málimdedi.
— Mańǵystaý oblysynda gazdyń bekitilgen baǵasy — 72 teńge. Bul — Qazaqstan boıynsha eń tómengi baǵa. Qazirgi tańda óńirdegi jaǵdaı turaqty. Suıytylǵan munaı gazynyń baǵasyn kóterý máselesi kún tártibinde joq, — deıdi ol.
Jaýapty tulǵalardyń málimetinshe, Jańaózen qalasy, Qaraqııa, Beıneý, Mańǵystaý, Túpqaraǵan jáne Munaıly aýdandarynda gaz jetkizilimi men onyń satylýy jiti baqylaýda.
Óńir bıliginiń málimetinshe, suıytylǵan munaı gazyn jetkizý kólemi birtindep ulǵaıyp, jaqyn arada avtogaz tapshylyǵy tolyq joıylady.
Buǵan deıin, Aqtaýdaǵy avtogaz kezegine qatysty ákimdik túsinikteme berdi.
