Mańǵystaýdaǵy Atameken aýylynda jer asty sýy kóterilip, úılerge kirip jatyr

AQTAÝ. KAZINFORM – Jer asty sýynan Atameken aýyldyq okrýgindegi Kóktem, Bolashaq jáne Shaǵala turǵyn úı massıvteri zardap shekken. Sý 13 úıdiń aýlasyna jáne 7 úıdiń ishine kirgen.

Úıine sý kirgen turǵyndardyń biri - Jumaǵalı Qonysov mundaı jaǵdaıdyń alǵash ret bolǵanyn aıtady. 

- Kúnine 1-2 kólik sý sorǵyzbasam bolmaıdy. Myna kórshilerim úıleriniń astyn bıiktetip, salyp aldy. Meniń úıim ortada, oıda qalyp otyr. Sondyqtan sý bizdiń úıdiń aldyna jınalady. Endi mine, ishke de kirdi. Úıde otyrý múmkin emes, - deıdi Jumaǵalı Qonysov. 

Turǵyndardyń sózinshe, jer asty sýynyń kóterilýine qardyń erýi sebep bolǵan. Mol sýdy drenaj júıesi ıgere almaǵan.

Al, kommýnaldyq qyzmet shaqyrtýǵa kelip bolmaıdy. 

- Bul másele úsh jyl buryn bastaldy. Jaýyn, qar jaýsa boldy, kóretin kúnimiz osy. Drenaj júıesin ornattyq deıdi, ol birde istese, birde istemeıdi. Qaıta-qaıta qońyraý shalyp, sý soratyn kólik shaqyramyz. Kóship keteıik desek, bul úıler endi ótpeıdi, - deıdi aýyl turǵyny Maral Amanııazova. 

Munaıly aýdany ákiminiń orynbasary Nurhan Mustafaevtyń aıtýynsha, 6-naýryzdan bastap turǵyndardan 150-ge jýyq shaqyrtý túsken. Búginde barlyǵyna mamandar baryp, sý sorý jumystaryn júrgizgen. 11 myń tekshe metr sý shyǵarylǵan. 

- Jer asty sýy kóterilmeý úshin, ortalyqtandyrylǵan káriz júıesin júrgizemiz. Drenajdy júıeler soǵan qosylady. Jobalyq smetalyq qujaty ázir. Sáýir aıynyń ortasyna deıin saraptamadan oń qorytyndysyn alamyz dep josparlap otyrmyz. Sosyn bıýdjetke qarjylandyrýǵa usynamyz. Jobanyń quny - 4 mıllıard teńge, - dedi aýdan ákiminiń orynbasary Nurhan Mustafaev. 

Mańǵystaý oblystyq tótenshe jaǵdaılar departamentiniń habarlaýynsha, aımaqta eldi-mekenderdi sý basý qaýpi joq. Tek Munaıly, Beıneý aýdandary men Jańaózen qalasynda jer asty sýy máselesi bar. 

Buǵan deıin Tótenshe jaǵdaılar mınıstri sý tasqynyna daıyndyqty jedel aıaqtaýdy tapsyrǵan bolatyn.