Mańǵystaýda 10 adamnyń ómirin qıǵan apattan keıin jedel shtab quryldy

ASTANA. KAZINFORM — Mańǵystaý oblysynda 10 adamnyń ómirin qıǵan qaıǵyly jol-kólik oqıǵasyna baılanysty Іshki ister mınıstriniń tapsyrmasymen jedel shtab quryldy, dep habarlaıdy ІІM baspasóz qyzmeti.

Shtab táýlik boıy jumys isteıdi.

— Mınıstr qylmystyq istiń tergeý barysyn óz baqylaýyna aldy. Qazirgi ýaqytta tergeý aıasynda júrgizýshiniń is-qımyly, kóliktiń tehnıkalyq jaǵdaıy, marshrýt jáne tasymaldaý sharttary tekserilip jatyr, — dedi ІІM resmı ókili — departament bastyǵy Shyńǵys Alekeshev.

Anyqtalǵandaı, jolaýshylar qasıetti Beket-Ataǵa qajylyq saparǵa shyqqan. Barlyǵy Qazaqstan azamattary, ártúrli óńirlerden kelgen. Zardap shekkender aýrýhanaǵa jetkizildi, olarǵa barlyq qajetti medıtsınalyq kómek kórsetilip jatyr.

Іshki ister mınıstrligi ákimdikter men profıldi memlekettik organdarmen birlese otyryp, qaza tapqandar men zardap shekkenderdiń otbasylaryna keshendi kómek uıymdastyrýda, sonyń ishinde: 

• qaza tapqandardyń denesin óńirlerge jetkizý;

• týystarymen turaqty baılanys ornatý; 

• jerleý rásimin uıymdastyrýǵa kómek kórsetý;

• zań aıasynda, saqtandyrý jáne uıymdastyrýshylyq máselelerdi sheshýge qoldaý.

Týystaryna barlyq aqparat dereý berilip otyrady.

— Іshki ister mınıstrligi qaza tapqandardyń týystary men jaqyndaryna qaıǵyryp kóńil aıtady. Sonymen qatar barlyq júrgizýshi men tasymaldaýdy uıymdastyrýshylardy jolda qaýipti jaǵdaı týdyrmas úshin sharshaǵan kúıde rólge otyrmaýǵa, kólikke artyq júk salmaýǵa shaqyramyz. Sharshaǵan júrgizýshiniń ózi úlken apatqa sebep bolýy múmkin, — dedi Shyńǵys Alekeshev.

Eske salsaq, Mańǵystaýda jol-kólik apatynan 10 adam qaza tapty. Sondaı-aq jol apatynan aman qalǵan úsh adamnyń densaýlyq jaǵdaıy belgili boldy.