Mańǵystaýda «Jumysshy mamandyqtar jyly» aıasynda 850 bos jumys oryndary usynyldy
AQTAÝ. KAZINFORM – Elimizde 2025 jyl «Jumysshy mamandyqtar jyly» dep jarııalandy. Bul bastama jumysshy mamandyqtarynyń mańyzdylyǵyn arttyrýǵa, jastardy osy salaǵa tartýǵa jáne eńbek naryǵynda suranysqa ıe mamandyqtar boıynsha bilikti kadrlardy daıarlaýǵa baǵyttalǵan. Mańǵystaýda osy baǵytta óńirlik shtab qurylyp, is-sharalar jospary bekitildi.
Oblystyq bilim basqarmasy tehnıkalyq jáne kásiptik bilim bóliminiń bas mamany Raýshan Muqanovanyń aıtýynsha, aımaqta jumysshy mamandyqtar jyly «Adal eńbek – Adal tabys» taqyrybynda saltanatty túrde ashylyp, aqparattyq-túsindirý jumystary aýqymdy túrde júrgizilgen. Osy kezge deıin 13 taqyryptyq kórme men 7 ınteraktıvti alańda kolledjder oqytylatyn mamandyqtar tanystyrylyp, 25 iri kásiporynnyń 850 bos jumys oryndary usynylǵan. 700 mektep oqýshysyna kásibı baǵdar berilgen.
– Josparǵa sáıkes kolledjge oqý-zerthanalyq ǵımaratty teńgerimge alý, jańa ıdeıalar hakatonyn ótkizý, ІT hub ashý, jumys berýshilerdiń naqty tapsyrmasy boıynsha maqsatty bilim berý tapsyrysyn ulǵaıtý, óńirdiń eńbek naryǵynyń suranysyna sáıkes jańa mamandyqtar ashý jumystary júrgizildi, - deıdi Raýshan Muqanova.
Mamandar mektep oqýshylaryna kásiptik baǵdar berý maqsatynda, oblystaǵy iri 8 kásiporynǵa 1 750 oqýshylarmen ekskýrsııa uıymdastyryp, ashyq esik kúnderi ótkizilgen. Sondaı-aq oblystaǵy 2 kolledj Halyqaralyq Parıj akademııasy arqyly halyqaralyq akkredıtteýden ótip, taǵy bir kolledj NCCER halyqaralyq qaýymdastyǵynan ótip jatyr.
– Kolledjder men kásiporyndar, joǵary oqý oryn arasynda 52 yntymaqtastyq týraly memorandýmǵa qol qoıyldy. Tenarıs kompanııasy tarypynan 28 stýdentke 260 myń teńge kóleminde 1 rettik shákirtaqy berildi. «Balyq óndirý» jáne «Teri jáne ton buıymdaryn óńdeý», «Qutqarý jumystary» boıynsha quzyrettik ortalyqtary ashyldy. Sonymen qatar NCOC kompanııasy demeýshiligi esebinen «Tigin óndirisi» quzirettilik ortalyǵy ashyldy, - deıdi oblystyq bilim basqarmasy tehnıkalyq jáne kásiptik bilim bóliminiń bas mamany Raýshan Muqanova.
Oblysta «Jumysshy mamandyqtar jyly» aıasynda aýqymdy chempıonattar ótkizilgen. Onyń biri ulttyq qundylyqtardy dáriptep, atadan balaǵa mıras bolǵan kásip túrlerin ıgerýge baǵyttalǵan «DalaSkills» aımaqaralyq chempıonaty. Oǵan 10 quzyrettilik boıynsha 9 óńirden 200 adam qatysqan. Onyń aıasynda eńbek naryǵyna qajetti 14 sala boıynsha forsaıt-sessııalar uıymdastyryldy. Sonymen qatar WordSkills Aktau – 2025 oblystyq chempıonaty ótken.
– Chempıonatqa óńirdiń 21 kolledjinen 300-den astam stýdent pen 1000 jýyq oqýshy qatysty. Chempıonat qorytyndysy boıynsha 32 stýdent respýblıkalyq chempıonatqa joldama aldy. «Elektronıka», «Avtonomdi mobıldi robototehnıka», «Prototıpteý» quzyrettilikteri boıynsha «DostiSkills-2025» halyqaralyq salalyq chempıonaty ótkizildi. Oǵan Qytaı Halyq respýblıkasy, Reseı federatsııasy, Avstrııa, Saýd Arabııasy memleketterinen ókilder qatysyp, tájirıbelerimen bólisti, - deıdi Raýshan Muqanova.
