Mańǵystaýda júk kóligi mingen turǵyn aýyl halqyn gazsyz qaldyrdy
AQTAÝ. KAZINFORM - Jańaózen quramyna kiretin Kendirli aýylynda júk kóligin júrgizgen turǵyn gaz qubyry jelisin qaǵyp, apatqa sebepker boldy. Qazirgi ýaqytta aýyl turǵyndary ortalyqtandyrylǵan gazdan ajyratyldy.
Atalǵan oqıǵa Kendirli aýylyndaǵy Juldyz shaǵyn aýdanynyń Sherqala kóshesinde bolǵan. 63-A ýchaskesi mańyndaǵy qıylysta jeke menshik MAZ avtokóliginiń júk salatyn bóliginiń kóterilip ketýine baılanysty orta qysymdy gaz qubyrynyń bir bóligin ilip áketken.
«Júk kóligi júrgizýshisiniń jeke basy anyqtaldy. Ol túski ýaqytta úıine kelip, jumysqa shyǵyp bara jatqanda oqys jaǵdaıǵa ushyraǵan. «Kaztransgazaımaq» brıgadasy iske jumyldyrylyp, jóndeý jumystaryna kiristi. Oqıǵadan eshkim zardap shekken joq», - dedi aýyl ákimi Meken Muhamet.
Kendirli aýylynda bolǵan apattyq jaǵdaıǵa baılanysty gaz jelisine jóndeý jumystary aıaqtalǵanǵa deıin kógildir otyn ýaqytsha óshirýli bolady.
