Mańǵystaýda jol jóndeý jumysyna bólingen qarjydan 2,7 mlrd teńge qysqartyldy
AQTAÝ. KAZINFORM – Mańǵystaý oblysynda «Jetibaı – Jańaózen – Kendirli – Túrikmenstan shekarasy» respýblıkalyq avtojolyn jóndeý jobasynyń smetasynan 2,7 mlrd teńge qysqartyldy. Bul týraly Bas kólik prokýratýrasy habarlady.
Kólik prokýrorlary jol jobalaryn zerdeleý barysynda atalǵan avtojoldyń kúrdeli jóndeýine qatysty jobalyq-smetalyq qujattamada keıbir materıaldar men jumys túrleriniń baǵasy durys kórsetilmegenin anyqtaǵan.
Prokýratýranyń usynysynan keıin jobanyń smetalyq quny qaıta esepteldi. Nátıjesinde joba quny 21,6 mlrd teńgeden 18,9 mlrd teńgege deıin tómendedi.
Osylaısha, prokýrorlyq qadaǵalaý sharalarynyń nátıjesinde bıýdjet qarajatynyń 2,7 mlrd teńgesin tıimsiz jumsaýǵa jol berilmedi.
Jóndelip jatqan «Jetibaı – Jańaózen – Kendirli – Túrikmenstan shekarasy» avtojolynyń ýchaskesi 50 shaqyrymdy quraıdy. Jumysty «QazAvtoJol» UK» AQ belgilengen kestege sáıkes júrgizip jatyr.
Kompanııanyń málimetinshe, bıyl jolǵa asfaltbetonnyń eki qabaty tóselip, kólik qozǵalysy qamtamasyz etildi. Ýaqytsha jol belgileri ornatylǵan.
Asfaltbetonnyń úshinshi, usaq túıirshikti qabatyn tóseý jumystary kelesi jyldyń jaz aılaryna josparlanǵan. Jol jóndeý jumystaryn 2027 jyldyń III toqsanynda aıaqtaý kózdelip otyr.
Buǵan deıin, Jol jóndeýge 10 mlrd teńge tıimsiz bólingeni anyqtaldy.
