Mańǵystaý joldaryn salǵan aqsaqal 39 nemere-shóbereniń ortasynda ǵumyr keship otyr
AQTAÝ. KAZINFORM — Eńbekpen eseıip, mańdaı terimen el ıgiligine úles qosqan jandardyń ómir joly — keıingi urpaqqa ónege. Mańǵystaý aýdanynyń turǵyny Oljabaı Jumaǵalıuly ǵumyrynyń basym bóligin jol qurylysy salasyna arnap, óńirdegi avtomobıl joldarynyń damýyna úles qosty. Búginde ol jubaıy Sánaı Jubanııazovamen birge alty bala tárbıelep ósirgen, 26 nemere men 13 shóbere súıgen ardaqty qarııa.
Eńbek jolyn júrgizýshilikten bastaǵan
Oljabaı Jumaǵalıuly 1946 jylǵy 10 qańtarda Mańǵystaý aýdanyna qarasty «Qarasaı» ujymsharynda dúnıege kelgen. Shaıyr jáne Shahta aýyldaryndaǵy mektepterde bilim alyp, aýyl sharýashylyǵyn mehanıkalandyrý ýchılışesin támamdaǵan. Keıin Almaty polıtehnıkalyq ınstıtýtynyń qurylys fakýltetinde oqyp, qurylys ınjeneri mamandyǵyn meńgergen.
Eńbek jolyn 1964 jyly aýdandyq avtokólik joldary mekemesinde júrgizýshi bolyp bastaǵan. Araǵa bir jyl salyp, ásker qataryna shaqyrylyp, úsh jyl azamattyq boryshyn ótegen. 1968 jyly elge oralǵan soń jol qurylysy salasyndaǵy jumysyn jalǵastyryp, kásibı biligin arttyrýǵa den qoıǵan.
Tehnıkany jaqsy meńgergen, iske tııanaqty jas mamannyń qabiletin baıqaǵan jergilikti basshylar ony jol qurylysy boıynsha bilimin jetildirýge jibergen. Osylaısha, ol jumys pen oqýdy qatar alyp júrip, tájirıbe jınaqtady.
Óńir joldarynyń qurylysyna úles qosty
1964 jyldan 2001 jylǵa deıin Oljabaı Jumaǵalıuly oblys pen aýdan aýmaǵyndaǵy avtomobıl joldaryn salý jumystaryna belsene aralasty. 1979 jyly jańadan qurylǵan jóndeý-qurylys basqarmasynyń Shetpe bólimshesine basshy bolyp taǵaıyndaldy.
Ol aýdan ortalyǵy Shetpeni aýyldarmen baılanystyratyn asfalt jáne qıyrshyq tas tóselgen joldardyń salynýyna atsalysty. Oblys ortalyǵyna jáne Manata asýy arqyly kórshiles aýdandarǵa qatynaıtyn kúre joldardyń qurylysynda da eńbegi bar. Sonymen qatar Ushtaǵan, Shaıyr, Jarmysh aýyldaryndaǵy qatqyl tabandy joldardyń salynýyna yqpal etti.
2002 jyldan bastap «Mańǵystaý jol qurylysy materıaldary kombınatynyń» Shetpedegi № 1 tsehynda basshylyq qyzmet atqardy. Osy saladaǵy kópjyldyq eńbegi men kásibı tájirıbesiniń arqasynda áriptesteri ony abyroıly maman retinde tanydy.
Oljabaı Jumaǵalıulynyń eńbegi eleýsiz qalǵan joq. Ol «Qazaqstannyń qurmetti jolshysy» ataǵyna ıe bolyp, «Eńbek ardageri» medalimen marapattalǵan.
Berekeli shańyraqtyń báıteregi
Eńbek pen otbasylyq qundylyqtardy qatar ustanǵan Oljabaı Jumaǵalıuly jubaıy Sánaı Jubanııazovamen birge alty bala tárbıelep ósirdi. Jubaıy da aýdandyq ortalyq kitaphanada 38 jyl boıy taban aýdarmaı eńbek etti. Ol «Qazaqstannyń qurmetti kitaphanashysy» tósbelgisimen marapattalǵan.
Búginde qos qarııa eki ul men tórt qyzynan taraǵan urpaqtyń ortasynda baqytty ǵumyr keship otyr. 26 nemere men 13 shóbere úshin olar — aqylshy, otbasynyń berekesi men birligin saqtap otyrǵan qadirli jandar.
Buǵan deıin Almatyda 300-den astam júz jasaǵan qarııa turatynyn jazǵanbyz.
