Mańǵystaýda jol apatynan zardap shekken taǵy bir jolaýshy kóz jumdy
AQTAÝ. KAZINFORM — Aqtaýdan Beıneý aýdanyna baǵyt alǵan jolaýshylar mingen avtobýstyń taǵy bir jolaýshysy aýrýhanada kóz jumdy. Bul týraly oblystyq densaýlyq saqtaý basqarmasy habarlady.
Eske salaıyq, 16 qańtar túngi saǵat 01:30 shamasynda Aqtaý-Beıneý tas jolynda avtobýs apatqa ushyrap, oqıǵa ornynda 4 adam qaza tapty.
Taǵy 42 adam túrli dene jaraqattarymen Beıneý aýdandyq aýrýhanasyna jetkizildi.
- Ókinishke qaraı, osy oqıǵa ornynda 4 adam qaza taýyp jáne bir adam Beıneý kópbeıindi aýrýhanasyna jetkizilip, qaza tapty. Qazirgi tańda 13 adamnyń densaýlyǵy qanaǵattanarlyq jaǵdaıda. 3 naýqas reanımatsııalyq bólimde em qabyldap jatyr. Ári qaraı emdeý taktıkasyn qaraý maqsatynda, biz Densaýlyq saqtaý mınıstrligimen, shuǵyl ulttyq medıtsınalyq úılestirý ortalyǵymen tyǵyz baılanysta otyrmyz, - deıdi oblystyq densaýlyq saqtaý basqarmasy basshysynyń orynbasary Bıbizada Dúısenbaeva.
Osy oqıǵaǵa qatysty oblystyq ákimdik janynan jedel shtab qurylyp, jol apatynyń saldaryn joıý, zardap shekkenderge qajetti medıtsınalyq jáne psıhologııalyq kómek kórsetý boıynsha keshendi sharalar qabyldanǵan. Beıneý aýdanyna joǵary sanatty bilikti dárigerler toby jiberilgen.
Dárigerlerdiń málimetinshe, zardap shekkender bas-mı jaraqattary, keýde qýysy men ishki aǵzalardyń soǵylýy, súıek synýlary syndy aýyr jaraqattar alǵan.
- Atalǵan oqıǵa boıynsha qylmystyq is qozǵalyp, avtobýs júrgizýshisi ýaqytsha ustaý ızolıatoryna qamaldy. Oqıǵa saldarynan 5 adam qaza taýyp, 42 adam zardap shekti. 16 naýqas aýrýhanada em alyp jatyr. Al, qalǵandary úılerine jiberildi. Tergeý amaldary jalǵasyp jatyr, - deıdi Beıneý aýdandyq polıtsııa bóliminiń bastyǵy Erkebulan Іzkenov.