Mańǵystaýda jol apatyna túsken naýqastardyń biri sanavıatsııamen Aqtaýǵa jetkizildi

AQTAÝ. KAZINFORM — Oblystyq densaýlyq saqtaý basqarmasynyń basshysy Bekbolat Іzbasarovtyń aıtýynsha, jol apatyna túsken 3 adamnyń jaǵdaıy aýyr. 

Zardap shekkenderdiń bas mıy shaıqalyp, qabyrǵa jáne aıaq súıekteri synǵan. Naýqastardyń biri túnde sanavıatsııamen oblys ortalyǵy Aqtaý qalasyna jetkizildi.

Kólik júrgizýshi men 2 jolaýshynyń ómirin saqtap qalýǵa dárigerler qoldan keletin kómekti jasap jatyr.

— Kólik júrgizýshi Jańaózen qalasynyń turǵyny. Al, eki naýqas Qaraǵandy oblysynyń turǵyndary. Túnde oblystyq sanavıatsııa brıgadasy Jańaózen qalasyna joldanǵan bolatyn. Naýqastardy qarap, teksergennen keıin bir naýqas Aqtaýǵa oblystyq aýrýhanaǵa jetkizildi. Qazir ol jansaqtaý bóliminde, jaǵdaıy turaqty aýyr. Barlyq medıtsınalyq kómekti tolyq kólemde alyp jatyr, — deıdi basqarma basshysy.

Eske salaıyq, keshe kúndiz saǵat 16-00 shamasynda Senek aýylynan 90 shaqyrym jerde «Toıota» markaly mınıven aýdaryldy. Kólikte 12 jolaýshy bolǵan. Segizi oqıǵa ornynda, eki adam aýrýhanaǵa jetkizý kezinde kóz jumdy. Marqumdardyń arasynda Aqmola, Qaraǵandy oblysynyń turǵyndary bar.

Buǵan deıin, Jol apatynan qaza tapqan azamattardyń týystaryn Mańǵystaý oblysyna jetkizý úshin bort jiberilgeni týraly jazǵan bolatynbyz.