Mańǵystaýda JI bar beınebaqylaý júıesi oqýshylardyń psıhoemotsııalyq jaǵdaıyn taldaıdy
ASTANA. KAZINFORM — Mańǵystaý oblysynda otbasylyq-turmystyq zorlyq-zombylyqtyń aldyn alý jumysy kúsheıtildi, dep habarlaıdy oblystyq prokýratýranyń baspasóz qyzmeti.
Búgin oblys prokýrory Serikqalı Kúshálıevtiń tóraǵalyǵymen otbasylyq-turmystyq zorlyq-zombylyqtyń aldyn alý jáne kámeletke tolmaǵandarǵa qarsy qylmystardyń aldyn alý sharalarynyń tıimdiligin talqylaýǵa arnalǵan úılestirý keńesiniń otyrysy ótti. Otyrysta oblys ákminiń orynbasary, sot organdarynyń tóraǵalary, quqyq qorǵaý qurylymdarynyń basshylary, qalalar men aýdandardyń ákimderi, bilim basqarmasynyń ókilderi, sondaı-aq qoǵamdyq birlestikter men psıhologter qatysty.
Keńes barysynda otbasylyq-turmystyq qatynas salasyndaǵy zańdylyqtyń qazirgi jaǵdaıyna jáne balalar quqyqtaryn qorǵaýǵa baǵa berilip, quqyq buzýshylyq sebepteri men jasóspirimder arasynda sýıtsıdke jol bermeý máseleleri talqylandy jáne psıhologııalyq kómek kórsetý mehanızmderiniń tıimdiligi qaraldy.
2025 jyldyń qorytyndysy boıynsha óńirde otbasylyq-turmystyq zorlyq-zombylyqqa baılanysty qylmystar 2024 jyldyń sáıkes kezeńimen salystyrǵanda 27,8%-ǵa azaıǵany atap ótildi.
Profılaktıkalyq jumystyń tıimdiligin arttyrý maqsatynda Bas Prokýrordyń tapsyrmasyna sáıkes oblysta «Aıqyn nátıje» pılottyq jobasy júzege asyrylyp jatyr.
Joba aıasynda Munaıly aýdanynyń № 12 orta mektebinde jasandy ıntellekt elementteri bar beınebaqylaý júıesi engizildi, ol onlaın rejıminde oqýshylardyń psıhoemotsııanaldyq jaǵdaıyn taldaýǵa múmkindik berip, sýıtsıdtik minez-qulyqtyń aldyn alý boıynsha mektep psıhologtarynyń naqty jumysyna qoldaý kórsetedi.
Oblys prokýrory Serikqalı Kúshálıev otbasylyq-turmystyq zorlyq-zombylyqtyń aldyn alý jáne kámeletke tolmaǵandardyń quqyqtaryn qorǵaý júıeli túrde vedomstvoaralyq ózara is-qımyldy talap etetinin atap ótti.
— Árbir zorlyq-zombylyq faktisi, otbasynda nemese jasóspirim ortasynda jaǵdaıdyń nasharlyǵy týraly árbir sıgnal ýaqtynda quqyqtyq jáne psıhologııalyq baǵalaýdy alýy tıis. Memlekettik organdar men azamattyq qoǵamnyń kúsh-jigerin biriktirgende ǵana balalar úshin qaýipsiz ortany qalyptastyryp, otbasy ınstıtýtyn nyǵaıtýǵa bolady, — dedi ol.
Keńes qorytyndysy boıynsha úılestirýdi kúsheıtýge, profılaktıkalyq mehanızmderdi jetildirýge jáne kásibı psıholog qaýymdastyǵynyń quqyq buzýshylyqtardyń aldyn alýdaǵy qatysýyn keńeıtýge baǵyttalǵan qosymsha sharalar qabyldandy.
Budan buryn Mańǵystaý polıtsııasy bastyǵy men dáriger ushaqta shetel azamatyn qutqarǵanyn jazǵanbyz.