Mańǵystaýda Jetibaı aýyly mańyndaǵy qoqys polıgony eki kúnnen beri tutanyp jatyr
AQTAÝ. KAZINFORM — Mańǵystaý oblysynyń Qaraqııa aýdanyndaǵy Jetibaı aýylynyń mańyndaǵy qatty turmystyq qaldyqtar polıgonynda qoqys ekinshi kún qatarynan tutanyp jatyr. Saldarynan eldimeken aýmaǵyn tútin basqan. Qazirgi ýaqytta byqsyǵan órtti tolyq sóndirý jumystary júrgizilip jatyr.
Qatty turmystyq qaldyqtar polıgony Jetibaı aýylynan shamamen 10 shaqyrym jerde ornalasqan. Qaraqııa aýdanynyń ákimi Symbat Tóretaevtyń aıtýynsha, qoqystyń tutanýyna aýa raıynyń qatty ysýy sebep bolýy múmkin.
— Sońǵy kúnderi aýa temperatýrasy óte joǵary bolyp tur. Sonyń saldarynan bos shyny ydystar kún sáýlesiniń áserinen tutanǵan bolýy múmkin dep boljap otyrmyz. Qazir tutanyp jatqan aýmaq topyraqpen kómilip jatyr. Jumysqa jergilikti kommýnaldyq qyzmetter men munaı kompanııalarynyń tıegishteri jáne samosvaldary jumyldyryldy, — deıdi aýdan ákimi.
Qoqystyń tutanýyn joıý jumystaryna qatty jel kedergi keltirip otyr.
Mańǵystaý oblystyq ekologııa departamentiniń mamandary 11 tamyzda Jetibaı aýylynda atmosferalyq aýaǵa aspaptyq ólsheý júrgizip, synama alǵan. Nátıjesinde aýa quramyndaǵy kómirtek totyǵynyń mólsheri shekti ruqsat etilgen kontsentratsııadan asqany anyqtalǵan.
Oblystyq tótenshe jaǵdaılar departamentiniń málimetinshe polıgondaǵy órt 9 tamyz kúni tańerteń bolǵan. Órt bolǵan aýmaqtyń jalpy kólemi 170 sharshy metrdi qurady.
Buǵan deıin, Mańǵystaýdaǵy Qyzylsaı ulttyq parkine kirý baǵasy ózgergenin jazǵan bolatynbyz.
