Mańǵystaýda jeńil kólik pen jolaýshylar avtobýsy soqtyǵysyp, bir adam qaza tapty
AQTAÝ. KAZINFORM — Jol-kólik apaty keshe saǵat 13:30 shamasynda Batyr men Qyzyltóbe-2 aýyldarynyń arasyndaǵy trassada bolǵan.
Jeńil kólik pen jolaýshylar avtobýsy (PAZ) soqtyǵysyp, jeńil avtokóliktiń júrgizýshisi oqıǵa ornynda qaza tapty.
Aldyn ala málimet boıynsha, jeńil avtokóliktiń júrgizýshisi kólikti basqara almaı, qarsy baǵytqa shyǵyp ketken.
Al, avtobýsta 4 jolaýshy men kondýktor bolǵan. Olardyń eshqaısysy zardap shekken joq.
Mańǵystaý oblystyq polıtsııa departamentiniń habarlaýynsha, oqıǵa boıynsha QR Qylmystyq kodeksiniń 345-baby, 3-bóligi (kólik quraldaryn júrgizý nemese paıdalaný erejelerin buzý) boıynsha sotqa deıingi tergeý bastalǵan.
— Oqıǵa ornynda tekserý jumystary júrgizildi, qajetti saraptamalar taǵaıyndaldy. Qazir apattyń barlyq mán-jaıyn anyqtaý maqsatynda tergeý amaldary júrgizilip jatyr, — delingen habarlamada.
Buǵan deıin, Mańǵystaýda qıyrshyq tasty zańsyz óndirgen kompanııa anyqtalǵan edi.