Mańǵystaýda jekemenshik emshara kabınetterinde eki adam kóz jumdy
AQTAÝ. KAZINFORM — Oblystyq medıtsınalyq jáne farmatsevtıkalyq baqylaý departamentiniń basshysy Nursulý Muhambetıarovanyń málimetinshe, bıyl toǵyz aıda óńirde jekemenshik protsedýralyq kabınetterde 41 adam anafılaktıkalyq shok alǵan. Ókinishke qaraı, eki adamdy aman alyp qalý múmkin bolmady.
— Oqıǵanyń biri Munaıly aýdany, Qyzyltóbe aýylynda bolǵan. Jas jigit dárihanadan antıbıotık alyp, sol jerde protsedýralyq kabınettiń qyzmetin paıdalanǵan. Inektsııadan keıin naýqastyń jaǵdaıy kúrt nasharlap, júregi toqtap qalǵan. Jedel járdem shaqyrylyp, «103» qyzmeti kelgen kezde bıologııalyq ólim tirkeldi. Osy oqıǵa boıynsha densaýlyq saqtaý basqarmasynyń joldamasy negizinde bizdiń departament jospardan tys tekserý júrgizdi. Tekserý barysynda atalǵan protsedýralyq kabınette medıtsınalyq qyzmet kórsetýge lıtsenzııa bolmaǵany, tamyrishilik jáne bulshyqetke salynatyn ınektsııalar dárigerdiń taǵaıyndaýynsyz jasalǵany, sondaı-aq antıbıotıkke allergııalyq synama júrgizilmegeni anyqtaldy. Dári-dármekti saqtaý tártibi de buzylǵan. Medıtsınalyq qyzmetkerdiń mamandaný sertıfıkaty da, sońǵy bes jylda biliktiligin arttyrý týraly qujaty da bolmaı shyqty. Tekserý materıaldary protsessýaldyq sheshim qabyldaý úshin polıtsııa departamentine joldandy. Qazir sotqa deıingi tergeý júrip jatyr, — deıdi oblystyq medıtsınalyq jáne farmatsevtıkalyq baqylaý departamentiniń basshysy Nursulý Muhambetıarova.
Nursulý Muhambetıarovanyń aıtýynsha, oblysta Densaýlyq saqtaý mınıstrliginiń tapsyrmasymen, jekemenshik protsedýralyq kabınetterdiń zańsyz qyzmetin anyqtaý úshin qoǵamdyq monıtorıngtik toptar qurylǵan.
— Qyrkúıek aıynda Aqtaýda 46 protsedýralyq kabınet anyqtaldy. Olardyń altaýyna departament tarapynan jospardan tys tekserýler júrgizilip, bir mıllıon teńgeden astam aıyppul salyndy. Tekserý kezinde lıtsenzııanyń joqtyǵy nemese talaptarǵa sáıkes emestigi, dári-dármekterdiń saqtaý erejeleriniń buzylýy, keıbir dárilerdiń jaramdylyq merziminiń ótip ketkeni belgili boldy. 46 kabınettiń ishinen 12-si óz erkimen jumysyn toqtatyp, lıtsenzııalarynan bas tartty. Osyndaı tekserýler aldaǵy ýaqytta Munaıly aýdany, Jańaózen jáne basqa da aýdandarda júrgiziledi, — deıdi departament basshysy.
Buǵan deıin, Qaraǵandyda jeke klınıkada er adam kóz jumǵan bolatyn.