Mańǵystaýda jeke sot oryndaýshy 3 mln teńgeden astam qarjyny týystarynyń shotyna aýdarǵan
ASTANA. KAZINFORM – Mańǵystaý oblysynda jeke sot oryndaýshysyna qatysty qyzmettik ókilettigin teris paıdalaný faktisi boıynsha qylmystyq is qozǵaldy. Bul týraly prokýratýranyń baspasóz qyzmeti habarlady.
Vedomstvonyń málimetinshe, qazirgi ýaqytta prokýratýra jeke sot oryndaýshylarynyń óndirisindegi atqarýshylyq qujattardyń oryndalý zańdylyǵyna tekserý júrgizip jatyr.
Tekserý barysynda jekelegen sot oryndaýshylardyń boryshkerlerden óndirip alynǵan qarajatty óndirip alýshylarǵa aýdarýǵa arnalǵan arnaıy esepshottan úshinshi tulǵalardyń, onyń ishinde ózderiniń jaqyn týystarynyń shottaryna 3 mln teńgeden astam qarajatty negizsiz aýdarǵany anyqtalǵan.
«Atalǵan jeke sot oryndaýshysyna qatysty Qylmystyq kodekstiń 251-babynyń 1-bóligi boıynsha qylmystyq is qozǵalyp, tergep-tekserý amaldary júrgizilýde», – dep habarlady prokýratýra.
Qazirgi ýaqytta jeke sot oryndaýshylarynyń óndirisindegi atqarýshylyq qujattardyń ýaqytyly oryndalýyna qatysty tekserý jalǵasyp jatyr.
Aıta keteıik, Tarazda jeke sot oryndaýshysy 1,1 mln teńgeni jymqyrǵany úshin sottaldy.
