Mańǵystaýda jaz bastalǵaly 6 adam sýǵa batyp ketti
AQTAÝ. KAZINFORM — Qaıǵyly oqıǵalardyń bárinde qaýipsizdik sharalary saqtalmaǵan.
Osyǵan oraı, tótenshe jaǵdaılar departamentiniń qyzmetkerleri, polıtsııa jáne qoǵam belsendileri teńiz jaǵalaýynda demalýshylarǵa sýda qaýipsizdik talaptaryn saqtaý boıynsha túsindirý jumysyn júrgizdi.
Іs- sharaǵa oblys ákimi janyndaǵy áıelder isi jáne otbasylyq-demografııalyq saıasat jónindegi komıssııanyń jáne oblystyq analar keńesiniń múshesi Anar Shamshadınova, oblys ákimi janyndaǵy áıelder isi jáne otbasylyq-demografııalyq saıasat jónindegi komıssııanyń múshesi Roza Mahambetova, oblystyq analar keńesiniń múshesi Altyn Saqtaǵanova qatysty.
— Shomylý maýsymynda qaıǵyly oqıǵalardyń aldyn alý maqsatynda búgingi reıdti komıssııa múshelerimen birge uıymdastyryp otyrmyz. Ata-analar men balalarǵa eskertý jasadyq. Halyqtyń amandyǵy biz úshin árdaıym birinshi orynda. Balalardy jalǵyz, qaraýsyz qaldyrmaıyq. Tyıym salynǵan jerlerge sýǵa túspeý kerek. Óıtkeni ot pen sý — tilsiz jaý, — dedi Anar Shamshadınova.
Sondaı-aq, Mańǵystaý oblysynyń tótenshe jaǵdaılar departamenti azamattyq qorǵanys basqarmasynyń aǵa ofıtseri Bektas Muratov senbi kúni kámeletke tolmaǵan eki bala joǵalyp ketip, tótenshe jaǵdaılar qyzmetkerlerigiń kómegimen tabylǵanyn aıtty.
Sýǵa túsý maýsymy bastalǵaly 6 adam sýǵa ketken. Onyń ishinde ekeýi — kámelet jasyna tolmaǵan bala.
— Sýǵa batý faktileri jabdyqtalmaǵan orynda jıi kezdesedi. Tyıym salynǵan oryndarda sýǵa túsken jaǵdaıda ákimshilik jaýapkershilik qarastyrylǵan. Sýdaǵy qaýipsizdik erejelerin kez kelgen jerde saqtaý qajet. Kúndelikti teńiz jaǵalaýynda TJD 9 mobıldi beketi kezekshilik atqarady. Al demalys kúnderi 17 mobıldi beketke deıin kóbeıtiledi, -dedi Bektas Muratov.
Budan bólek, quzyrly organ qyzmetkerleri reıd sharalaryn kúsheıtti.
Oǵan 200 ge jýyq adam jumyldyrylyp, sýdaǵy qaýipsizdik erejeleri boıynsha 650 jadynama taratyldy.
Buǵan deıin Mańǵystaýda 13 jasar jasóspirimniń sýǵa ketkenin jazǵan edik.
