Mańǵystaýda «Jasyl el» eńbek jasaǵy óz jumysyn bastady
AQTAÝ. KAZINFORM – Mańǵystaý oblysynda jazǵy demalys kezinde oqýshylar men stýdentterdiń bos ýaqytyn tıimdi paıdalanyp, olardy eńbekke baýlý maqsatynda «Jasyl el» eńbek jasaǵy quryldy.
Baǵdarlama aıasynda jastar qorshaǵan ortany abattandyryp, kógaldandyrý jáne tazalyq jumystaryn júrgizedi. Sondaı-aq, sol úshin olarǵa eńbekaqy tólenedi.
Byltyr atalǵan jobany oryndaýǵa 119 mıllıon teńge bólinip, 1 637 jas jumyspen qamtylǵan bolatyn. Al bıyl baǵdarlamany júzege asyrý úshin, jergilikti bıýdjet esebinen 256,8 mıllıon teńge bólindi. Joba aıasynda 2 888 jasty jumyspen qamtý josparlanyp otyr.
Aıta keteıik, jastardyń jalaqysy Qazaqstan Respýblıkasynyń zańnamasyna sáıkes eń tómengi jalaqy - 85 000 teńge kóleminde bolady. Jastar 2 nemese 3 maýsymǵa bólinip jumys isteıdi.
Budan bólek, jastar resýrstyq ortalyqtarynyń uıymdastyrýymen «Jasyl el» jasaǵynyń jastaryna oqytý sharalary, kezdesýler, mádenı jáne sporttyq sharalar uıymdastyrylmaq.
