Mańǵystaýda jas jubaılar daýys berýge katermen keldi
AQTAÝ. KAZINFORM — Mańǵystaýda referendým kúni erekshe oqıǵa boldy. Teńizde qydyryp júrgen jas jubaılar referendým ýchaskesine toı kólegimen kelip, jurtty tańqaldyrdy.
Jas jubaılar Kaspıı teńizinde ózderiniń love story beınebaıanyn túsirýge shyqqan. Biraq dál osy kúni el taǵdyryna qatysty mańyzdy sát — referendým ótip jatqanyn eske alǵan olar katerdiń baǵytyn ózgertip, daýys berýge kelgen.
Bul kórinis ýchaskege kelgen adamdardyń nazaryn birden aýdarǵan. Óıtkeni bul jaı ǵana romantıkalyq sát emes, azamattyq jaýapkershiliktiń erekshe belgisi boldy.
Oblystyq saılaý komıssııasynyń málimetinshe, mundaı oqıǵalar Mańǵystaýlyq jastardyń qoǵamdyq protsesterge beıjaı qaramaıtynyn kórsetedi.
— Jańa ómir bastaǵan jas jubaı úshin búgin tek otbasylyq tarıhtaǵy ǵana emes, el tarıhyndaǵy da mańyzdy kún. Keıde azamattyq ustanym úlken sózdermen emes, osyndaı qarapaıym árekettermen kórinedi, — delingen habarlamada.
Buǵan deıin, Aqtaýda referendým kúni týǵan sábıge Ata-Zań esimi qoıylǵan bolatyn.