Mańǵystaýda japan dalada aq qasqyr fototuzaqqa túsip qaldy

Mańǵystaý oblysynda «Manashy» memlekettik tabıǵı qaýmalynda jalǵyz jortyp júrgen aq qasqyr arnaıy ornatylǵan fotoqaqpanǵa túsip qaldy, dep habarlaıdy Kazinform.

Mańǵystaý oblystyq Tabıǵı resýrstar jáne tabıǵat paıdalanýdy retteý basqarmasynyń málimetinshe, túz taǵysynyń bul tuqymy Mańǵystaý óńirinde óte sırek kezdesedi.

«Adam kózine túse bermeıtin aq qasqyrlar Mańǵystaý aımaǵynda óte sırek kezdesetin jyrtqysh ańnyń biri. Ol óte sezimtal ári kez kelgen tabıǵat jaǵdaıyna óte tózimdi. Aq qasqyr ózi mekendeıtin aýmaqta eń qaýipti jyrtqysh sanalady. Onyń salmaǵy orta eseppen 30-80 keli aralyǵynda bolady», - dedi Mańǵystaý oblystyq Tabıǵı resýrstar jáne tabıǵat paıdalanýdy retteý basqarmasynyń ókili.

Osydan eki jyl buryn mańǵystaýlyq vıdeograftyń kamerasyna sırek kezdesetin jyrtqysh qyzyl qasqyr túsip qalǵan bolatyn. Sol joly teńiz jaǵasynda júrgen urǵashy qasqyr drondy kórip, qashqan edi. Keıin mamandar qyzyl qasqyrdyń qasqyr tuqymdasyna jatatyn jyrtqysh sútqorekti ekenin atap, Mańǵystaýǵa qalaı kelgeni belgisiz ekenin málimdedi.

«Mańǵystaý oblysynda aq qasqyrlar eki apta buryn fotoqaqpanǵa túskeni baıqaldy. Atalǵan ańnyń túrin óńirdiń sımvoly deýge bolady. Sebebi bul sırek kezdesetin ań. Buǵan deıin múldem kóringen emes. Aq qasqyrlarǵa ázirge zertteý jumystary júrgizilmedi. Alda mamandarǵa júginip, olardyń sanyn anyqtaý josparymyzda bar», - dedi Mańǵystaý oblystyq tabıǵı resýrstar jáne tabıǵat paıdalanýdy retteý basqarmasy basshysy Ásel Balmanova.