Mańǵystaýda jaǵajaı mańyna káriz sýy aqqan
AQTAÝ. KAZINFORM – Mańǵystaý oblysy Qaraqııa aýdanynyń ortalyǵy Quryq aýylynda teńizge qaraı aqqan suıyqtyqtyń káriz sýy ekeni anyqtaldy. Ekologtar zaqymdanǵan qubyrdy anyqtap, zerthanalyq taldaý júrgizgen.
Buǵan deıin aýyl turǵyny jergilikti jaǵajaı mańynan jaǵymsyz ıis shyǵyp, belgisiz suıyqtyqtyń teńizge qaraı aǵyp jatqanyn aıtyp, BAQ-tardyń birine shaǵymdanǵan. Áleýmettik jelide taraǵan vıdeodan suıyqtyq balalar alańyna jaqyn jerden aǵyp ótkenin jáne úlken aýmaqty alǵanyn baıqaýǵa bolady.
Osy jaǵdaıǵa baılanysty Mańǵystaý oblystyq ekologııa departamenti tekserý júrgizgen. Nátıjesinde qubyrdyń zaqymdanǵany jáne sonyń saldarynan sýdyń jer betine shyqqany anyqtaldy.
- Mamandar suıyqtyqtan synama alyp, zerthanalyq taldaý jasady. Zertteý qorytyndysy onyń káriz sýy ekenin rastady.Zaqymdanǵan qubyr Qaraqııa aýdanynyń turǵyn úı-kommýnaldyq sharýashylyq bólimine tıesili,-dep habarlady Mańǵystaý oblysy boıynsha ekologııa departamentiniń ókilderi.
Osyǵan baılanysty vedomstvo bólim basshylyǵyn ekologııalyq zańnama talaptaryn buzǵany úshin jaýapkershilikke tartý máselesin qaraý jóninde prokýratýraǵa hat joldaǵan.
Qaraqııa aýdanynyń ákimdigi qubyrdyń tolyqtaı jóndelgenin málimdedi.
Buǵan deıin Óskemende ekologııalyq pasportty ázirleý bes jylǵa kesheýildegenin jazǵan edik.
