Mańǵystaýda jaǵalaýdan tabylǵan óli ıtbalyqtarǵa qatysty quzyrly organ jaýap berdi
AQTAÝ. KAZINFORM — Mańǵystaý oblysynyń Túpqaraǵan aýdanyndaǵy Baýtın aýyly mańynan 15 ıtbalyqtyń óleksesi tabyldy. Bul týraly Mańǵystaý oblysy boıynsha balyq ınspektsııasy basqarmasy habarlady.
Basqarmanyń málimetinshe, 2026 jylǵy 12 qazanda Aqtaý qalasynyń turǵyny Kaspıı teńiziniń jaǵalaýynan ıtbalyqtardyń ólekselerin baıqaǵan. Osyǵan baılanysty 13 qazanda jaǵalaý aýmaǵyn tekserý úshin jedel top qurylǵan.
Onyń quramyna balyq ınspektsııasy basqarmasynyń, oblystyq janýarlar dúnıesin qorǵaý jónindegi mekemeniń, «Kaspıı ıtbalyǵy» memlekettik tabıǵı rezervatynyń, Ekologııa departamentiniń jáne veterınarııalyq qyzmettiń ókilderi kirdi.
Tekserý barysynda teńiz jaǵalaýynan 15 ıtbalyqtyń óleksesi tabyldy. Olardyń qatty shirip ketkeni anyqtaldy. Osyǵan baılanysty zertteý júrgizý jáne ólim sebepterin anyqtaý úshin tin úlgilerin alý múmkin bolmaǵan.
Aldyn ala boljam boıynsha, ıtbalyqtar biraz ýaqyt buryn qyrylyp, teńizde qalqyp júrgen bolýy múmkin. Keıin ońtústik-batystan soqqan qatty jel olardy jaǵaǵa shyǵarǵan.
Qazirgi ýaqytta ólekselerdi jaǵalaýdan arnaıy polıgonǵa tasymaldap, joıý jumystary uıymdastyrylyp jatyr.
Buǵan deıin, Mańǵystaýda Kaspıı ıtbalyqtaryna qatysty taǵy bir jaǵdaı tirkeldi.
