Mańǵystaýda jabaıy qustardy ýaqytsha ońaltý ortalyǵy ashyldy
AQTAÝ. KAZINFORM — Aqtaý qalasy mańyndaǵy Aqshuqyr aýylynda jyrtqysh jáne Qyzyl kitapqa engen qustardy ýaqytsha ońaltýǵa arnalǵan alǵashqy memlekettik ortalyq ashyldy. Munda jaraqat alǵan qustarǵa kómek kórsetilip, emdelgennen keıin tabıǵı ortaǵa jiberiledi.
Mańǵystaý oblysy arqyly jyl saıyn myńdaǵan qonys aýdaratyn qus ótedi. Ortalyq jumysyn bastaǵan alǵashqy aıda alty qus qabyldanǵan. Olardyń qatarynda búrkit, kóksary, kúıkentaı jáne Qyzyl kitapqa engen tilemish bar.
Máselen, Jetibaı ken ornynan tabylǵan kóksary munaı ónimderine bylǵanyp, qanaty synǵan kúıde jetkizilgen. Qazir mamandar qusty emdep, operatsııaǵa daıyndap jatyr.
— Qazir basqa qustar ońaltý kezeńinen ótip jatyr. Olardy tolyq saýyqqannan keıin tabıǵı ortaǵa jiberemiz. Al búrkittiń negizgi qanat qaýyrsyndary zaqymdanǵan. Sondyqtan onyń túleýin kútý kerek. Qaýyrsyndary tolyq qalpyna kelgennen keıin ǵana tabıǵatqa jiberiledi. Qazir kún ystyq bolǵandyqtan, qustar kóbine sýsyzdanyp, álsirep keledi. Sondaı-aq bıik ǵımarattardyń áınegine soǵylyp nemese jyrtqyshtardyń shabýylynan jaraqat alatyndary bar, — deıdi veterınar dáriger Alına Sharıpova.
Mamandardyń aıtýynsha, ortalyqqa jetkizilgen qustardyń basym bóligin turǵyndar ózderi ákeledi. Jaqynda Aqshuqyr aýylyndaǵy turǵyn úıdiń mańynan ushýdy endi ǵana úırengen kúıkentaı tabylǵan. Birneshe saǵat boıy jerde otyrǵan qusqa jergilikti mysyqtar qaýip tóndirgen. Qazir jas qus tabıǵı ortaǵa qaıta jiberýge daıyndalyp jatyr.
Ortalyqtyń negizgi mindeti — jaraqat alǵan qustarǵa shuǵyl kómek kórsetý, emdeý jáne olardy tabıǵı ortaǵa beıimdeý.
— Bul joba Mańǵystaý oblysynyń tabıǵatty qorǵaý ınspektsııasy men tabıǵı resýrstar jáne tabıǵat paıdalanýdy retteý basqarmasynyń bastamasymen qolǵa alyndy. Sońǵy jyldary turǵyndar jaraqat alǵan qustardy taýyp, kómek surap jıi habarlasatyn boldy. Al oblysta jabaıy qustardy ońaltatyn arnaıy ortalyq bolmaǵan. Qyzyl kitapqa engen jáne sırek kezdesetin qustardy qorǵaý maqsatynda memlekettik granttyń qoldaýymen osy ortalyq quryldy, — deıdi qoǵamdyq qordyń jetekshisi, volonter Merýert Lytkına.
Ortalyq mamandary qustardy emdeýmen qatar, olardyń jaraqattanýy men qyrylýynyń negizgi sebepterin anyqtaý úshin monıtorıng júrgizedi. Jınalǵan málimetter aldaǵy ýaqytta sırek kezdesetin qustardy qorǵaýdyń keshendi júıesin ázirleýge negiz bolmaq.
Buǵan deıin, Mańǵystaýda qutqarýshylar jaǵalaýdan qashyqtap ketken jupqa kómektesti.
