Mańǵystaýda zańsyz berilgen 3,5 myń gektar jer memleketke qaıtaryldy
AQTAÝ. KAZINFORM – Qazaqstan Respýblıkasy Aýyl sharýashylyǵy mınıstrligi jer resýrstaryn basqarý komıteti jospardan tys tekserý kezinde, Qaraqııa aýdanynyń "Kosa Ada" aýmaǵynda ornalasqan aýdany 3 457 gektar jer ýchaskesiniń zańsyz berilgenin anyqtady. Jer ýchaskesiniń kadastrlyq quny - 3,1 mlrd teńgeni quraıdy.
Jer ýchaskesi jer komıssııasynyń qaraýynsyz jáne jerge ornalastyrý jobasyn jasamaı resimdelgen. Sondaı-aq, jer Kodeksiniń 43-babynyń normalaryn buza otyryp, jeke menshikke berilgeni belgili boldy.
Osyǵan sáıkes, jer resýrstaryn basqarý komıtetiniń ókilderi óz ókilettikteri sheńberinde Mańǵystaý oblystyq mamandandyrylǵan aýdanaralyq ekonomıkalyq sotyna jer ýchaskesine quqyqty kýálandyratyn qujattardy jaramsyz dep taný týraly talap aryzben júgingen.
Sot sheshimimen talaptar tolyǵymen qanaǵattandyryldy. Sot sheshimi zańdy kúshine endi.