Mańǵystaýda «West Oil Software» JShS jumysshylarynyń ereýilin sot zańsyz dep tanydy
Ótken jyly 11 jeltoqsanda bastalǵan «West Oil Software» JShS qyzmetkerleriniń ereýilin Qaraqııa aýdandyq soty (Mańǵystaý oblysy) zańsyz dep tanydy, dep habarlaıdy Kazinform atalǵan mekemege silteme jasap.
«Ereýilge qatysýshylar ESOT júıesine sáıkes jalaqyny teńestirý, mekemeni «QazMunaıGaz» ulttyq kompanııasy qurylymyna kirgizý jáne arnaıy tehnıkalardy jańartý talaptaryn qoıǵan bolatyn. Alǵashqy 2 talapty oryndaý múmkin emes. Úshinshi másele boıynsha talapty «QazMunaıGaz» qanaǵattandyrýǵa daıyn jáne ázirlengen tehnıkany jańartý protsesin bastady. Oryndalýy múmkin emes talaptardyń qoıylýy nátıjesinde kompanııaǵa kún saıyn materıaldyq shyǵyn keltirilýde», - delingen «West Oil Software» JShS taratqan aqparatta.
Habarlamada aıtylǵandaı, ulttyq kompanııaǵa shamamen 499 mln teńge shyǵyn kelgen.
«Bul kompanııanyń qarjylyq jaǵdaıyna ǵana emes, ereýilge shyqqan jumysshylardyń otbasylyq bıýdjetine de áser etedi. Ereýil bastalǵannan beri olardyń áreketiniń zańsyzdyǵy týraly birneshe ret túsindirildi. Sonymen qatar jumysqa shyǵý qajettiligi týraly habarlandy. Degenmen is sátsiz aıaqtaldy. Jekelegen belsendiler ereýil jaqyn arada bizdiń paıdamyzǵa sheshiledi dep olardy jańylystyrý arqyly ustap otyr», - deıdi málimetke súıensek.
Zańsyz ereýilden bas tartyp, 50-den astam adam jumys oryndaryna oralǵan.
«Biz ereýildiń jekelegen kóshbasshylarynyń oılary men áreketterin bilemiz. Osyǵan deıin jumystan shyǵarylǵan 7 belsendi «West Oil Software» JShS ornyna basqa kompanııany ákelýge tyrysýda. Osy oraıda 12 qańtardan bastap zańsyz ereýildiń jalǵasýyna túrtki bolǵan qyzmetkerlerdi jumystan shyǵaramyz», - delingen habarlamada.
Sondaı-aq, jelidegi aqparatta málim etilgendeı qyzmetin bosatqandardyń ornyna Qaraqııa aýdanyndaǵy jumyssyz azamattardy qabyldaý jospary týraly aıtylǵan.
«Eger ereýil toqtamasa kompanııa tergelip jatqan qylmystyq is sheńberinde jaýapqa tartý týraly máseleni sheshý úshin tıisti materıaldardy quqyq qorǵaý organdaryna berýge májbúr.Bizdiń jumysshylarymyzdyń jalaqysy basqa kólik kompanııalardyń jalaqylarynan orta eseppen alǵanda joǵary», - dep qorytyndylanǵan túsinikteme.
