Mańǵystaýda vahtada jumys isteıtin adamdar mingen avtobýs apatqa ushyrady
AQTAÝ. KAZINFORM – Oqıǵa Qarajanbas-Qaraturyn tas jolynda boldy. Munaı óndirýshilerge qyzmet kórsetetin kompanııa qyzmetkerlerin Qaraturyn ken ornyna jumysqa alyp bara jatqan avtobýs jylqyny soǵyp, apatqa ushyraǵan.
Oqıǵanyń saldarynan tórt adam túrli dene jaraqatyn aldy. Onyń biriniń eki aıaǵy synyp, Aqtaý qalasyndaǵy oblystyq aýrýhanaǵa jetkizildi.
Mańǵystaý oblystyq polıtsııa departamentiniń málimetinshe, kólik júrgizýshisi jol erejesin buzyp, jaýapqa tartylǵan. Saraptamalar taǵaıyndalǵan. Sonyń nátıjesine qaraı, júrgizýshini qylmystyq jaýapkershilikke tartý máselesi qaralady.
- Qazirgi tańda jylqynyń ıesi izdestirip jatyr. Onyń kim ekeni anyqtalǵannan keıin aýyl sharýashylyǵy janýarlaryn jaıý qaǵıdalaryn buzý deregi boıynsha mal ıesi ákimshilik jaýapkershilikke tartylady, - delingen habarlamada.
Buǵan deıin, Túrkistan oblysynda jol apatynan 4 adam mert bolǵanyn jazǵan bolatynbyz.