Mańǵystaýda úzdik mektep ujymyna 3 laýazymdyq jalaqy men qyzmettik avtokólik beriledi
AQTAÝ. KAZINFORM - Mańǵystaý oblysynyń ákimi Nurdáýlet Qılybaı óńirde bilim sapasyn arttyrý maqsatynda jyl saıyn «Úzdik mektep ujymy» reıtıngin ótkizýdi tapsyrdy, dep habarlaıdy óńir ákiminiń baspasóz qyzmeti.
- Memeleket basshysy Qasym-Jomart Toqaev óńirlerde bilim sapasyn arttyrýǵa erekshe nazar aýdaryp keledi. Sonyń aıasynda oblysymyzda zaman talabyna saı jaıly mektepter salynyp jatyr. Endi sol mektepterdegi bilim deńgeıin kóterý úshin jyl saıyn reıtıng jasap, «Tabysty mektep» jobasyn iske qosýdy uıǵardyq. Biz ustazdar men oqýshylardyń yntasy men jigerin arttyrýdy, shyǵarmashylyq qabiletterin ashýdy maqsat tutyp otyrmyz, - dedi oblys ákimi Nurdáýlet Qılybaı.
Jobanyń maqsaty - bilim berý uıymdaryndaǵy úzdik is-tájirıbelerdi nasıhattaý jáne mektepterdiń jetistikterin anyqtaý, mekteparalyq básekelestikti damytý.
«Tabysty mektep» jobasy oqý jylynyń kórsetkishteri negizinde qorytyndylanady.
Kórsetkishteri joǵary úzdik mektepterge:
- 1 orynǵa - mektep dırektoryna qyzmettik avtokólik beriledi jáne mektep ujymy (mektep dırektorynan bastap kishi qyzmetkerlerge deıin) 3 laýazymdyq jalaqymen marapattalady;
- 2 orynǵa - mektep ujymy (mektep dırektorynan bastap kishi qyzmetkerlerge deıin) 2 laýazymdyq jalaqymen marapattalady;
- 3 orynǵa - mektep ujymy (mektep dırektorynan bastap kishi qyzmetkerlerge deıin) 1 laýazymdyq jalaqymen marapattalady.
Osyǵan deıin Mańǵystaý oblysynyń bilim basqarmasyna jańa basshy taǵaıyndalǵanyn habarladyq.
