Mańǵystaýda Ústirt taý qoıynyń sany artyp keledi
AQTAÝ. KAZINFORM – «Qyzylsaı» memlekettik óńirlik tabıǵı parkiniń ınspektorlary erekshe qorǵalatyn tabıǵı aýmaqtarda jyldaǵy josparǵa saı jabaıy janýarlarǵa kóktemgi sanaq jumystaryn júrgizdi. Mamandar jan-janýarlardyń qys mezgilinen qalaı shyqqanyn, jáı-kúıin baqylap, manıtorıng jumystaryn júrgizgen.
Nátıjesinde Qazaqstannyń «Qyzyl kitabyna» engen Ústirt taý qoıynyń sany byltyrǵy jylmen salystyrǵanda biraz óskeni anyqtaldy. Sanaq barysynda Ústirt taý qoıy býazdyq merzimi bolǵandyqtan taý eteginde saı-sala, jyra, kóktegen kebirlikten kóp kezdesken. Alǵashqy tólderi de kózge túsken.
Budan bólek «Qyzyl kitapqa» engen qaraquıryq, qaraqal, qarabaýyr buldyryq, jurtshy, ıtelgi, dala qyrany, tazqara sııaqty ań-qustar kezdesip, tirkelgen.
«Qyzylsaı» memlekettik óńirlik tabıǵı parkiniń ınspektorlary ólkemizde jyldan-jylǵa ań-qustardyń kóbeıip kele jatqanyn aıtady. Buǵan erekshe qorǵalatyn tabıǵı aýmaqtardyń úzdiksiz baqylaýda bolýy yqpal etýde. Tabıǵat qorǵaý ınspektorlary budan bylaı da tabıǵatty sol qalpynda saqtap, jabaıy janýarlardyń ósimin molaıtýǵa kúsh sala bermek.
Buǵan deıin, Aqtaý qalasynyń mańynda ejelgi eskertkishter týraly jazǵan bolatynbyz.
