Mańǵystaýda úsh aýysymdy mektep máselesi áli sheshilgen joq
AQTAÝ. KAZINFORM — Mańǵystaý oblysynda úsh aýysymdy mektep máselesi áli tolyq sheshilgen joq. Qazir óńirde úsh mektepte oqýshylar úsh aýysymda bilim alyp jatyr. Al bala sanynyń qarqyndy ósýine baılanysty aldaǵy jyldary oryn tapshylyǵy odan ári artýy múmkin.
Mańǵystaý oblystyq bilim basqarmasynyń málimetinshe, 2025-2026 oqý jylynda óńirde 19 myńnan astam bala birinshi synypqa qabyldanǵan. Qazirgi ýaqytta birinshi synyp oqýshylaryna oryn tapshylyǵy joq. Degenmen oblys boıynsha áli de úsh aýysymda jumys isteıtin úsh mektep bar. Olardyń barlyǵy Aqtaýda ornalasqan.
— 12-shaǵynaýdandaǵy № 12 mektepte 2 072 oqýshy bilim alady. Onyń 1 639-y, ıaǵnı 79,1 paıyzy osy shaǵynaýdannyń balalary. Qalǵan oqýshylar kórshiles shaǵynaýdandardan jáne Munaıly men Túpqaraǵan aýdandarynan qatynap oqıdy. Al 17-shaǵynaýdandaǵy № 31 «Keleshek» mektebinde 2256 oqýshy oqyp jatyr. Onyń 2 184-i nemese 96,8 paıyzy osy shaǵynaýdannyń turǵyndary. Qalǵan 72 oqýshy kórshiles shaǵynaýdandardan keledi, — delingen habarlamada.
Basqarma málimetinshe, atalǵan 72 oqýshyny bıyl qazan aıynda 16-shaǵynaýdanda ashylatyn № 35 «Keleshek» mektebine aýystyrǵan jaǵdaıda da, № 31 mekteptegi úsh aýysymdy oqytý máselesiniń tolyq sheshilmeý qaýpi bar. Buǵan 17-shaǵynaýdandaǵy jer teliminiń tapshylyǵy áser etip otyr. Jer kóleminiń tar bolýyna baılanysty bul aýmaqta 900 oryndyq mektep qana salynǵan.
— Úsh aýysymda bilim beretin taǵy bir oqý orny -19-shaǵynaýdandaǵy № 32 mektep. Munda 3007 oqýshy oqıdy. Onyń 2 438-i nemese 81 paıyzy osy shaǵynaýdannyń balalary bolsa, qalǵan 569 oqýshy kórshiles shaǵynaýdandardan qatynap keledi. Sondaı-aq mektebi joq 30 jáne 35-shaǵynaýdandardan 137 bala osy mektepte bilim alyp júr, — delingen habarlamada.
Bala sanynyń qarqyndy ósýi aldaǵy jyldary mekteptegi oryn tapshylyǵy máselesin odan ári kúrdelendirýi múmkin. Bilim basqarmasynyń boljamynsha, 2030 jylǵa qaraı oblystaǵy oqýshylar sany 217 990 balaǵa deıin ulǵaıady. Bul kórsetkish qazirgi deńgeımen salystyrǵanda 23 myńnan astam balaǵa artyq.
Osyǵan baılanysty 2030 jylǵa qaraı óńirde 11 myńǵa jýyq oryn tapshy bolýy múmkin. Oryn tapshylyǵyn azaıtý maqsatynda taǵy jeti mekteptiń jobalyq-smetalyq qujattamasy ázirlenip jatyr.
Buǵan deıin, Aqtaýda eki adam qaza tapqan kater apatyna qatysty jańa derekter jarııalandy.
