Mańǵystaýda Ulttyq quryltaıdaǵy reformalar men strategııalyq mindetter talqylandy
AQTAÝ. KAZINFORM – Búgin oblys ákimi Nurdáýlet Qılybaı Memleket basshysy Qasym-Jomart Toqaevtyń Ulttyq quryltaıdyń V otyrysynda sóılegen sózin talqylaý maqsatynda óńirlik zııaly qaýym ókilderimen kezdesti. Jıyn barysynda Prezıdenttiń qoǵamdy jańǵyrtý, ulttyq biregeılikti nyǵaıtý, áleýmettik ádilettilik pen jaýapty azamattyq ustanymdy qalyptastyrý jónindegi negizgi bastamalary keńinen talqylandy.
Kezdesýdi ashqan oblys ákimi Ulttyq quryltaıda kóterilgen bastamalar el damýynyń negizgi baǵyttaryn aıqyndaıtynyn atap ótti.
– Prezıdentimiz Qasym-Jomart Toqaev Ulttyq quryltaıdyń besinshi otyrysynda elimizdiń búgini men bolashaǵyna qatysty mańyzdy reformalar men strategııalyq mindetterdi belgiledi. Búgin sol bastamalardy óńir deńgeıinde talqylap, naqty josparlar ázirleý úshin bas qosyp otyrmyz. Qazirgi tańda el damýy jolyndaǵy reformalar naqty nátıjelerin berip keledi. Ekonomıkalyq ósim, halyqtyń ál-aýqatynyń artýy, ómir súrý sapasynyń jaqsarýy – sonyń aıǵaǵy. Bul jumystarǵa zııaly qaýym ókilderiniń qosar úlesi zor, - dedi Nurdáýlet Qılybaı.
Jıynda Mańǵystaýdyń jerasty meshitterin ıÝNESKO-nyń Búkilálemdik muralar tizimine engizý, mádenıet pen ónerdi damytý, rýhanı qundylyqtardy saqtaý, «Taza Qazaqstan» bastamasyn iske asyrý, otanshyldyqty nyǵaıtý, tsıfrlandyrý men jasandy ıntellektini damytý, energetıka, logıstıka jáne kólik ınfraqurylymyn jetildirý, parlamenttik reformalar jaıynda oılar ortaǵa salyndy.
Zııaly qaýym ókilderi Memleket basshysy kótergen ıdeıalardyń ózektiligin atap ótip, olardy óńirlik deńgeıde iske asyrý tetikteri jóninde pikir almasty.
Jıyn qorytyndysynda qatysýshylar Ulttyq quryltaıda aıtylǵan basymdyqtar Mańǵystaý óńiriniń áleýmettik-ekonomıkalyq jáne rýhanı damýyna serpin beretinin aıtyp, usynystar men bastamalardy aldaǵy ýaqytta birlesip júzege asyrýǵa daıyn ekenderin bildirdi.