Mańǵystaýda ulttyq kıimnen álemdik rekord ornady
AQTAÝ. KAZINFORM – Qazaq halqynyń mádenı murasyn álemdik deńgeıde nasıhattaýǵa oblys boıynsha túrli sala mamandary, etnos ókilderi, jastar men qarııalar da úles qosty.
Sondaı-aq ózge óńirlerdiń turǵyndary da arnaıy kelip, atsalysty.
— Men osy sharaǵa qatysý úshin Atyraý qalasynan keldim. Egde jastaǵy qazaq áıeliniń ulttyq kıimin kıip, jaýlyǵyn tartyp turmyn. Óz basym tarıhı sátke kýá bolyp, osy sharaǵa atsalysyp jatqanyma óte qýanyshtymyn, — deıdi Atyraý qalasynyń turǵyny Jaqsygúl Qajbanova.
Sharaǵa qatysýshylardyń basty maqsaty — qazaq ultyn álemge tanytý. Ulttyq salt-dástúrdiń qaımaǵy buzylmaǵan aımaq turǵyndary bul joly birlik pen tatýlyqty pash etti.
Rekord ornatý rásimi Kaspıı jaǵalaýynda ótti. Tirkeýden ótken qatysýshylar arnaıy jasaqtalǵan alańǵa jınalyp, Ulybrıtanııadan kelgen Gınness rekordtar kitabynyń resmı ókilderi esep júrgizdi. Birneshe saǵatqa sozylǵan sanaý nátıjesinde, qoıylǵan talaptardyń tolyq oryndalǵany rastalyp, Qazaqstannyń jańa álemdik rekord ıesi atanǵanyn dáleldeıtin arnaıy sertıfıkat tabystaldy.
Osylaısha, qazaqtyń ulttyq kıimi Gınness rekordtar kitabyna endi.
Mańǵystaý oblysynyń ákimi Nurdáýlet Qılybaı bul tarıhı oqıǵanyń ultymyzdyń mádenı murasyn halyqaralyq deńgeıde tanytýdaǵy mańyzyn atap ótip, jınalǵandardy Ulystyń uly kúnimen quttyqtady.
— Ulystyń uly kúninde tarıhı sáttiń kýási bolyp otyrmyz. Qazaq halqynyń tereń tarıhy men baı mádenı murasyn, ulttyq dástúrimizdi jer jahanǵa pash ettik. Mańǵaz Mańǵystaýymyzda qazaqtyń ulttyq kıiminen álemdik rekord ornady. Osynaý zor jetistikpenen barsha otandastarymyzdy quttyqtaımyn! Qazaq halqynyń mádenıetin nasıhattaýǵa atsalysqan bastamashy topqa, London qalasynan arnaıy kelgen Gınness rekordtar kitabynyń ókilderine jáne rekord ornatýǵa úles qosqan barsha qatysýshyǵa alǵysymdy bildiremin! Memleket basshysy Qasym-Jomart Kemeluly Toqaev Býrabaıda ótken IV Ulttyq quryltaıda «Ulttyq biregeıligimizdi nyǵaıtý jolynda Naýryz meıramynyń orny aıryqsha ekenin atap ótti. Prezıdentimizdiń bastamasymen Naýryz merekesi týraly jańa tujyrymdama ázirlendi. Elimiz Ulystyń uly kúnin 14 naýryzdan ıaǵnı Amal merekesinen bastap 10 kún boıy atap ótýde. Kún menen tún teńelip, Jer-Ana jańa kúıge enip, tirshilik ataýly oıanyp, aınala máre-sáre bolatyn Ulystyń uly kúni – jyl bastaýy áz-Naýryz barshańyzǵa qutty bolsyn, aǵaıyn! — dedi Nurdáýlet Qılybaı.
Oblys ákimine arnaıy sertıfıkatty tabystaǵan Gınness rekordtar kitabynyń resmı ókili Rıchard Stennıng tamasha nátıjege qol jetkizgen qazaq halqyn quttyqtady.
— Qurmetti qazaqstandyqtar, halqyńyzdyń basty merekesi — Naýryz meıramynda rekord jasadyńyzdar. Búgin qazaq eliniń salt-dástúrge berik ekenine, rýhty, talǵamy joǵary halyq ekenine kýá boldym. Shara da óte joǵary deńgeıde uıymdastyrylǵan. Tarıhı oqıǵa jasaýlaryńyzben shyn júrekten quttyqtaımyn! — dedi Rıchard Stennıng.
— Búgin qazaq halqy óziniń ulttyq kıimin, saltyn kórsetý úshin Gınness kitabyna ený maqsatynda osy alańǵa jınaldyq. Men óte baqyttymyn! Qazaq ultyn álem tanysyn! Men qazaq bolǵanyma maqtanamyn! Qazaqstan máńgi jasasyn, — deıdi Aqtaý qalasynyń turǵyny Baıan Tilepova.
Naýryz merekesine oraı Aqtaýda teńiz jaǵalaýynda 30 kıiz úı tigilip, qolóner sheberleriniń jármeńkesi uıymdastyryldy.
Shara barysynda ulttyq taǵamdar usynylyp, qazaqsha kúres, toǵyzqumalaq, asyq atý sekildi sporttyq jarystar ótti.
Amfıteatr alańynda ónerpazdar án men jyrdan shashý shashyp, teatrlandyrylǵan vokaldy-horeografııalyq qoıylym qoıdy.
Merekelik baǵdarlama elimizge tanymal estrada juldyzdarynyń gala-kontsertimen jalǵasty.
Aıta ketelik Petropavlda Gınness rekordtar kitabyna engen álemdegi eń uzyn kóshe jańǵyrtylmaq.
