Mańǵystaýda ýlanǵan oqýshylardyń sany 67-ge jetti

AQTAÝ. KAZINFORM - Atalǵan jaǵdaıǵa baılanysty quzyrly organ ókilderimen birlesken arnaıy shtab quryldy. 

Mańǵystaý oblysy ákiminiń orynbasary Zvıra Esbergenova aýrýhanaǵa baryp, oqýshylardyń jaǵdaıymen tanysty. Balalardyń densaýlyǵynyń jaqsarýyna qajetti barlyq jaǵdaı jasalýda. Ata-analarǵa psıhologııalyq kómek kórsetilip jatyr. Dárigerlerdiń aıtýynsha,  balalardyń jaǵdaıy birqalypty.

Jaǵdaıdyń neden bolǵanyn anyqtaý úshin, Mańǵystaý oblystyq sanıtarııalyq – epıdemıologııalyq baqylaý departamenti tekserý jumystaryn júrgizip jatyr. 

Oqıǵaǵa qatysty qylmystyq is qozǵalyp, sotqa deıingi tergep-tekserý jumystary bastaldy.

Eske sala keteıik, Mýnaıly aýdanynda №8 mekteptiń 21 oqýshysy 6 qyrkúıek kúni keshki mezgilden bastap, jedel járdem shaqyra bastaǵan. Shaǵymdary: ishiniń aýrýy, dene qyzýy kóterilýi. Buǵan deıin Mańǵystaýda alpysqa jýyq oqýshy astan ýlanǵanyn jazǵan edik. 

Búgingi kúni, saǵat 17:05-tegi jaǵdaı boıynsha 67 bala medıtsınalyq kómekke júgindi. 52 bala úı jaǵdaıyna baqylaýda. 13-bala aýrýhanada em qabyldap jatyr, - dep habarlaıdy Mańǵystaý oblystyq densaýlyq saqtaý basqarmasynyń baspasóz qyzmeti.