Mańǵystaýda UQK eks-orynbasary men Aqtaý áýejaıy aýdıtory 500 myń dollar bopsalaǵany úshin sottaldy

AQTAÝ. KAZINFORM — Mańǵystaý oblysynda Ulttyq qaýipsizdik komıtetine qarasty departament basshysynyń burynǵy orynbasary men Aqtaý áýejaıynyń qaýipsizdik aýdıtory kásipkerden 500 myń dollar bopsalaǵany úshin sottaldy.

Sot kabınetinde Mańǵystaý oblysynyń qylmystyq ister jónindegi mamandandyrylǵan aýdanaralyq sotynyń Ulttyq qaýipsizdik komıtetiniń oblystyq departamenti basshysynyń burynǵy orynbasary men «Aqtaý halyqaralyq áýejaıy» AQ avıatsııalyq qaýipsizdikti baqylaý jáne sapa aýdıtoryna qatysty úkimi shyqty.

Sot dereginshe, UQK eks-orynbasary 2023 jyldyń tamyzynda óńirdegi belgili kásipkerden 500 myń dollaryn bopsalap alýdy josparlaǵan. Ol bul iske áýejaı aýdıtoryn tartyp, oǵan negizgi bopsalaýshy rólin júktegen.

Tergeý materıaldaryna sáıkes, UQK eks-orynbasary óziniń qyzmettik múmkindikterin paıdalanyp, kásipker men onyń týystary týraly bedeline nuqsan keltirýi múmkin jeke sıpattaǵy málimetter jınaǵan. Keıin kásipkerge kompromat salynǵan konvert jiberilip, artynsha áýejaı aýdıtory telefon arqyly habarlasyp, máseleni «shetel valıýtasymen» úsh kún ishinde sheshýdi talap etken. Fotosýrettiń syrtynda «500 000» dep jazylǵan.

Kásipker talapqa keliskendeı bolyp, belgilengen kezdesýde 500 myń dollardyń ornyna 500 myń teńge bergen. Osydan keıin kúdiktiler ustalǵan.

Sotta UQK eks-orynbasary da, áýejaı aýdıtory da kinálaryn moıyndamady. Soǵan qaramastan, sot olardy bopsalaý boıynsha kináli dep tanydy. UQK eks-orynbasaryna qyzmettik ókilettigin asyra paıdalandy degen aıyp ta taǵyldy.

Sot úkimimen Ulttyq qaýipsizdik komıtetine qarasty departament basshysynyń burynǵy orynbasaryna baptardyń jıyntyǵy boıynsha 11 jyl, Aqtaý áýejaıynyń qaýipsizdik aýdıtoryna 8 jyl bas bostandyǵynan aıyrý jazasy taǵaıyndaldy. Sonymen qatar olardan jábirlenýshiniń paıdasyna moraldyq zııan retinde 1 mln teńge jáne shamamen 3 mıllıon teńge sot shyǵyndary óndirilmek. Úkim zańdy kúshine áli engen joq.

Buǵan deıin, Tarazda sport kesheniniń basshysyn bopsalaǵan úsh adam sottalǵan bolatyn.