Mańǵystaýda týrızmdi damytýǵa bólingen 117 mln teńgeni jymqyrǵan kásipker sottaldy
ASTANA. KAZINFORM — Mańǵystaý oblysynda týrıstik salany memlekettik qoldaý baǵdarlamasy aıasynda bólingen bıýdjet qarajatyn jymqyrý deregi boıynsha shyǵarylǵan úkim zańdy kúshine endi.
Mańǵystaý oblysy prokýratýrasynyń málimetinshe, tergeý barysynda jeke kásipker «A» ókili oryndalǵan qurylys jumystarynyń kólemi negizsiz ulǵaıtylǵan jalǵan jobalyq-smetalyq qujattamany paıdalaný arqyly Mańǵystaýdaǵy demalys bazasynyń qurylysyna jumsalǵan shyǵyndardyń bir bóligin óteý maqsatynda 117,2 mln teńge kólemindegi memlekettik sýbsıdııany zańsyz alǵany anyqtaldy.
Sonymen qatar nysannyń memlekettik qoldaý sharalary qoldanysqa engizilgenge deıin salynǵany jáne kórsetilgen qurylys jumystarynyń bir bóligi is júzinde oryndalmaǵany belgili boldy.
Budan bólek, qylmystyq jolmen alynǵan qarajatty zańdastyrý maqsatynda jymqyrylǵan bıýdjet qarajaty bank depozıtine ornalastyrylyp, nátıjesinde 5,6 mln teńge kóleminde qosymsha kiris alynǵan.
— Aqtaý qalalyq sotynyń úkimimen jeke kásipker «A» ókili asa iri mólsherde alaıaqtyq jasaý jáne qylmystyq jolmen alynǵan aqshany zańdastyrý qylmystaryn jasaǵany úshin kináli dep tanylyp, oǵan 5 jyl merzimge bas bostandyǵynan aıyrý jazasy taǵaıyndaldy, — dep habarlady vedomstvo.
Sot úkimi zańdy kúshine endi.
Prokýratýra memlekettik qoldaý baǵdarlamalary sheńberinde bólingen bıýdjet qarajatyn zańsyz alǵany úshin zańda belgilengen jaýaptylyq qarastyrylǵanyn eskertti.
Eske salaıyq, buǵan deıin BQO-da 56 mln teńge bıýdjet qarjysyn jymqyrǵan merdigerler sottalǵanyn habarlaǵanbyz.
