Mańǵystaýda týrızmdi damytý: kadr daıarlaýda Koreıa tájirıbesi qalaı paıdalanylmaq
AQTAÝ. KAZINFORM — Koreıanyń tehnıkalyq jáne kásiptik bilim berý júıesindegi ınnovatsııalyq tásilderi Mańǵystaý oblysyndaǵy oqý baǵdarlamalaryn jańǵyrtýǵa negiz bolmaq.
Mańǵystaý oblysynda týrızm salasyn damytý maqsatynda jergilikti kolledjderdiń Koreıa Respýblıkasynyń oqý oryndarymen ornatqan jańa áriptestigi óńirdegi kadr daıarlaýdyń mazmunyna ózgeris engize bastady.
Koreıamen ornatylǵan áriptestik týrızm salasyna qajetti kadrlardy daıarlaý júıesin kúsheıtip, elimizdiń batysyndaǵy týrıstik áleýetti damytýǵa tikeleı yqpal etýi múmkin.
Óńirlik delegatsııanyń Koreıadaǵy Sungwoon University, Hoseo University, Seowon University jáne basqa da bilim berý uıymdary ujymdarymen kezdesýi nátıjesinde birqatar memorandýmǵa qol qoıyldy. Bul qujattar ınjenerlik bilim, tsıfrlyq dıdaktıka, pedagogıkalyq baǵyt jáne akademııalyq mobıldik boıynsha birlesken jobalardy iske asyrýǵa jol ashady dep josparlanyp otyr.
Týrızm salasy úshin mańyzdy qadamdardyń biri — Mańǵystaý týrızm kolledjiniń Seowon University-men jasasqan seriktestigi. Osy yntymaqtastyq aıasynda «Týrızm» mamandyǵyna avıatsııalyq týrızm baǵytyndaǵy kásibı modýlderdi engizý josparlandy. Bul óńirdiń qyzmet kórsetý sapasyn kóterý jáne halyqaralyq standarttarǵa saı mamandar daıarlaý maqsatynda qolǵa alynyp otyr.
— Koreıa saparynda AI, Smart Energy jáne Digital Pedagogy baǵyttary boıynsha birlesken modýldik kýrstar men sertıfıkattyq baǵdarlamalardy ázirleýge, Hoseo University zerthanalary bazasynda qysqa merzimdi taǵylymdamalar men tájirıbeler uıymdastyrýǵa, oqytýshylarǵa tsıfrlyq tehnologııalar salasy boıynsha biliktilikti arttyrý kýrstaryn ótkizýge kelistik. Bul bilim salasyndaǵy jańa deńgeı, — dedi kolledj dırektory Janııa Sarmýrzına.
Budan bylaı týrıstik qyzmet kórsetýge qajetti soft skills, servıs mádenıeti jáne qaýipsizdik standarttary sııaqty naqty daǵdylardy damytýǵa basymdyq berilmek.
Oblystyq bilim basqarmasy bul seriktestikti óńirdegi tehnıkalyq jáne kásibı bilim júıesin jańǵyrtýdyń mańyzdy kezeńi dep baǵalap otyr.
Aıta ketelik Djekı Channyń «Qudiretti saýyt» fılminiń jalǵasy Mańǵystaýda túsirilýi múmkin.