Mańǵystaýda Túpqaraǵan jáne Qaraqııa aýdandary ákimdikteriniń laýazymdy tulǵalaryna aıyppul salyndy

AQTAÝ. KAZINFORM – Qazaqstan Respýblıkasy Básekelestikti qorǵaý jáne damytý agenttiginiń Mańǵystaý oblysy boıynsha departamenti Túpqaraǵan men Qaraqııa aýdandarynyń ákimdikterinde monopolııaǵa qarsy zańnamanyń buzylý derekterin anyqtady.

Quzyrly organnyń málimetinshe, jergilikti atqarýshy organdar jyl saıyn konkýrs ótkizbeı «Kazakh Osseter» JShS bolyp tabylatyn bir ǵana uıymdy aıqyndap, sol arqyly básekelestikti boldyrmaǵan. Osylaısha, shekara qyzmeti, ishki ister organdary men balyq ınspektsııasy reıdtik is-sharalar kezinde tárkilengen barlyq balyqty tek «Kazakh Osseter» JShS-ne berip otyrǵan.

Al zańnamaǵa sáıkes, jergilikti atqarýshy organdar tárkilengen bekire tuqymdas balyqtardy saqtaý jáne odan ári satý úshin uıymdy memlekettik satyp alý konkýrsyn ótkizý arqyly aıqyndaýǵa tıis. Sondyqtan ákimdikterdiń laýazymdy adamdaryna qatysty básekelestikke qarsy is-áreketter (áreketsizdik) jasaǵany úshin, monopolııaǵa qarsy organnyń qaýlysymen QR ÁQBtK 163-babynyń 1-bóligine sáıkes aıyppul salyndy.

Alaıda Qaraqııa aýdany ákimdiginiń bólim basshysy aıyppul salý týraly qaýlymen kelispeı, sotqa júgindi. Qaraqııa aýdany ákimdiginiń laýazymdy tulǵasynyń «bekire tuqymdas balyqtar tárkilengen jaǵdaıda jarty saǵat ishinde komıssııa qurylyp, 3 kún ishinde memlekettik satyp alý konkýrsyn ótkizý arqyly uıym aıqyndalady» degen ýájderin, sot negizsiz dep eseptedi.

Aqtaý qalasynyń ákimshilik quqyq buzýshylyqtar jónindegi mamandandyrylǵan sotymen jáne apellıatsııalyq sot alqasymen Monopolııaǵa qarsy organnyń qaýlysy zańdy jáne negizdi dep tanyldy. Nátıjesinde laýazymdy tulǵaǵa 300 AEK (1 107 600 tg) mólsherinde aıyppul salyndy. Túpqaraǵan aýdany ákimdiginiń laýazymdy tulǵasy ákimshilik is júrgizý materıaldarymen aqyry kelisip, qysqartylǵan is júrgizý tártibimen isti qaraýǵa nıet bildirdi jáne kózdelgen aıyppuldyń 50 paıyzyn 553 800 tg kóleminde aıyppul tóledi.