Mańǵystaýda tuńǵysh ret áskerı kater qurastyrylyp, paıdalanýǵa berildi
ASTANA. KAZINFORM – Respýblıka kúni qarsańynda Mańǵystaý oblysynda qurastyrylǵan «Shapshań» áskerı desanttyq kateri Kaspıı teńizine túsirildi. Bul týraly Mańǵystaý oblysy ákiminiń baspasóz qyzmeti habaralady.
Saltanatty is-sharaǵa Mańǵystaý oblysynyń ákimi Nurdáýlet Qılybaı, Qorǵanys mınıstriniń orynbasary general-leıtenant Sultan Qamaletdınov, Qarýly Kúshterdiń kontr-admıraly Ratmır Kamratov jáne áskerı qyzmetshiler men qala turǵyndary qatysty.
Sý jańa kater teńizdegi memleket shekarasyn, eldiń birtutastyǵyn qorǵaýǵa qyzmet etedi.
Alǵashqy bolyp sóılegen Qorǵanys mınıstriniń orynbasary jaýyngerler katerin teńizge jiberý qazaq jurty úshin qýanyshty sát ekenin aıtty. Onyń sózinshe, Mańǵystaýda jasalǵan kater óńirdiń teńiz áleýetiniń qarqyndy damyp jatqanyn ańǵartady.
– Prezıdent joldaýynda aıtqandaı, jahandyq áskerı tehnıka óndirisi damyǵan memleketterdiń ulttyq qorǵanys júıesinde sheshýshi ról oınaıdy. Qazirgi zaman – jańa tehnologııa zamany. Bul kater – Otanymyzdyń ınjenerııa salasynyń joǵary deńgeıiniń aıqyn dáleli», - dedi Sultan Qamaletdınov.
Óńir basshysy Nurdáýlet Qılybaı Ulttyq mereke – Respýblıka kúni qarsańynda bolyp jatqan tarıhı oqıǵanyń ǵalymdardyń tókken teri men eńbeginiń nátıjesi ekenin aıtty.
– Memleket basshysy Qasym-Jomart Toqaev qazaq qurylys ındýstrııasyn damytý, tereńdetý qajet dep baǵyt-baǵdar bergen edi. Mine, nátıjesin, jemisin kórip otyrmyz. Óńirimizde jasalǵan otandyq ónim el tynyshtyǵyn kúzetip, teńiz áskerleriniń nátıjeli qyzmet etýine kómektesedi. Osy jobany júzege asyrǵan azamattarǵa, mamandarǵa, qurylysshylarǵa kóp rahmet aıtamyn. Azamattar ózderiniń sheberlikterin dáleldedi, - dep ákim rızashylyǵyn bildirdi.
Jańa katerdi qurastyrǵan «Keme jabdyqtary jáne servıs» JShS-niń dırektory Dmıtrıı Donskoıdyń aıtýynsha, tek qorǵanys salasynda emes, azamattarǵa arnalǵan, týrızm, transport baǵytynda, tótenshe jaǵdaılar kezinde qoldanylatyn tehnıkalardy da jasaýǵa múmkindikteri bar.
