Mańǵystaýda teńiz jaǵalaýynan ólgen balyqtar tabyldy
AQTAÝ. KAZINFORM — Balyqtardyń ólekseleri Túpqaraǵan aýdany Baýtın eldi mekeniniń aýmaǵyndaǵy jaǵalaýdan anyqtalǵan. Turǵyndar shabaqtardyń arasynda kefal balyqtary da bar ekenin aıtady.
Mańǵystaý oblystyq ekologııa departamentiniń mamandary oqıǵa ornyna baryp, synamalar alǵan.
— 7 shildede zerthanalyq-taldamalyq baqylaý bóliminiń mamandary óńirdiń balyq sharýashylyǵy basqarmasynyń ókilderimen birlesip qajetti zertteýler júrgizý úshin sol jerge bardy. Balyqtyń óliminiń yqtımal sebepterin anyqtaý úshin, teńiz sýyn tekserý jáne synama alý júrgizildi, — delingen habarlamada.
Buǵan deıin, Aqtaýda teńiz jaǵalaýynan ıtbalyqtyń óleksesi tabylǵan edi.
Al, oǵan deıin AShM ıtbalyqtardyń qyrylý sebebin jarııalaǵan bolatyn.
