Mańǵystaýda teńiz jaǵalaýynan 279 ıtbalyqtyń óleksesi tabyldy
AQTAÝ. KAZINFORM – Teńiz sútqorektileri Túpqaraǵan aýdanyna qarasty Úrdik múıisi men Baýtın jaǵalaýy aralyǵynan anyqtalǵan. Oblystyq balyq ınspektsııasy basqarmasy Túpqaraǵan balyq ınspektsııa bóliminiń basshysy Qonarbaı Bazarbaevtyń aıtýynsha, ólgen ıtbalyqtardyń ushasy sáýir aıynan beri jaǵaǵa shyǵyp jatyr.
— Kúnbatystan, soltústik-batystan soqqan jelden keıin jaǵaǵa shyǵyp jatyr. Búginde 279 danasy anyqtaldy. Ótken aptada 117 ıtbalyqtyń óleksesi tabylyp, jaǵalaý tazartylyp edi. Keshe demalys kúnderi taǵy 59yn tirkedik. Inspektsııa men jergilikti atqarýshy organ ókilderi ushalardy jınap, arnaıy polıgonǵa aparyp jatyr, — deıdi bólim basshysy.
Jergilikti mamandar teńiz janýarlarynyń neden qyrylǵanyn bilmeıdi. Biraq, birnesheýi brakonerlik aýǵa oralyp shyǵypty.
— Itbalyqtar óte shirip ketken jaǵdaıda shyǵyp jatyr. Synama alý emes. Ókinishke oraı, aıta ketetin de derek bar, denesinde aý quraldarymen birge tabylyp jatqandar da bar. Sońǵy jaǵdaıda 13 danasy anyqtaldy. Itbalyqtardyń ólý sebebin anyqtaýmen ekologııa jáne gıdrobıologııa ınstıtýtynyń mamandary aınalysady. Biraq olar birneshe jyldan beri naqty mine, mynadaı jaǵdaıdan dep eshqandaı tujyrymǵa kele almaı otyr, — deıdi Túpqaraǵan balyq ınspektsııa bóliminiń basshysy Qonarbaı Bazarbaev.
Eske salaıyq, byltyr Kaspıı teńiziniń Túpqaraǵan aýmaǵynan 2212 ıtbalyqtyń ushasy tabyldy.
Buǵan deıin, Balyq sharýashylyǵy komıteti Kaspııdiń jaǵalaýynan 117 ıtbalyqtyń óleksesi tabylǵanyn habarlaǵan bolatyn.