Mańǵystaýda temirjol qyzmetkeri jumys ornynda kóz jumdy
AQTAÝ. KAZINFORM – Mańǵystaý oblysynda temirjol qyzmetkeri jumys ornynda kóz jumdy. Oqıǵaǵa baılanysty memlekettik eńbek ınspektsııasy tergep-tekserý jumysyn bastady.
«Qazaqstan temir joly» UK» AQ baspasóz qyzmetiniń málimetinshe, oqıǵa 5 shilde kúni shamamen saǵat 09:10-da Mańǵystaý magıstraldyq jeli bólimshesine qarasty №13 razezde bolǵan.
Razezd bastyǵy jumys ornynda kezekshi qyzmetkeriniń denesin tapqan. Oqıǵa ornyna jedel medıtsınalyq járdem brıgadasy men polıtsııa qyzmetkerleri shaqyrylǵan. Dárigerler 1983 jyly týǵan er adamnyń qaıtys bolǵanyn rastaǵan.
- Qazirgi ýaqytta atalǵan derek boıynsha Qazaqstan Respýblıkasy Eńbek jáne halyqty áleýmettik qorǵaý mınıstrligi Memlekettik eńbek ınspektsııasy komıtetiniń departamenti tergep-tekserý jumysyn júrgizip jatyr,- dep málimdedi kompanııanyń baspasóz qyzmeti.
Buǵan deıin Qostanaıdaǵy kásiporynda jumysshy áıel qolynan aıyrylǵanyn jazǵan edik.
