Mańǵystaýda tamaqtan ýlanǵan balalar dárigerdiń jiti baqylaýynda

AQTAÝ. KAZINFORM - Munaıly aýdanyndaǵy №8 jalpy bilim berý orta mektebinde oqýshylardyń ýlaný jaǵdaıy boıynsha jedel shtabtyń jumysy júrip jatyr.

- Dárigerler oqýshylardyń jaǵdaıyn tolyq baqylaýda ustap otyr. 7 qyrkúıek kúni saǵat 22:00-degi málimet boıynsha 141 bala medıtsınalyq kómekke júgindi. 82 bala emhanada em qabyldap jatyr. 43 bala úı jaǵdaıynda baqylaýda. 16 bala aýrýhanada jatyr, - dep habarlady oblystyq densaýlyq saqtaý basqarmasynyń baspasóz qyzmeti.

Qazir oblys boıynsha jedel-járdem brıgadasy qyzmetiniń mamandary tolyq quramda qyzmet kórsetip jatyr. Tósek-oryndar men dári-dármekter qory jetkilikti.

Eske salaıyq, oqýshylardyń jappaı astan ýlaný deregi Mýnaıly aýdanynda tirkeldi. 6 qyrkúıek kúni keshten bastap №8 mekteptiń 21 oqýshysy jedel járdem shaqyrǵan. Balalardyń báriniń ishi aýyryp, dene qyzýy kóterilgen. Bul týraly jazǵan edik. Soǵan baılanysty quzyrly organ ókilderimen birlesken arnaıy shtab qurylyp, qylmystyq is qozǵaldy.

Sońǵy resmı málimetke súıensek, astan ýlanǵan bala sany 141 boldy.